Merkezê Îrtîbatî û Çapemenîye yê QSDyî bîlançoya şerî ya 24 saetanê peyênan eşkera kerde. 

QSDyî vat: ‘’Hêrişê îşxalî yê dewleta tirke û çeteyanê ci vera Rojawanî zêdîyenê. 

Cepheyê Qereqozaxî de dewa Cerafî ya qezaya Sirînî ya Kobanê de vizêr bi droneyê çekdarî keyeyêkê sivîlan ame hedefkerdene û tîya de domanêk şehîd bi, 2 domanî zî birîndar bîyî.  Hetê bînî ra dewê Tîna, Cada, Bîr Hiso, Xeseq, Dîkan, Melha, Sinaa û Girê Sêvê û Qereqozaxî dîyayî bombayan ver. 

Cepheyê Awbendê Tişrînî de bi obusan herême dîyaye bombayan ver. Hêrişan ra xeylê keyeyan de şewat vejîya. Nêmroje ra dima îşxalkeran herême ancî daye bombayan ver û zeraro madî resa xeylê cayan ser.

Kobanê û Eyn Îsayî ser o temamîya roje de droneyê çekdarî û teyarayê şerî perrayî.’’