Hemserekê Ofîsê Karanê Multecî û Koçberan ê Îdareyê Xoserî yê Rojawanî Şêxmûs Ehmedî ANFyî rê qisey kerd û vist vîrî ke krîzê Sûrîye ra dima sûrîyeyîjî neçare mendê ke wareyanê xo ra koç bikerê.

Ehmedî bale ante ser ke ê seba ke meseleya multecîyanê sûrîyeyîjan çareser biba xîret kenê û prjeyan amade kenê. Ehmedî vat: ''Ma na mesele ser o rêxistinanê mîyanneteweyîyan de pêvînayîşî kerdî û qala projeyanê xo kerde. La ê seba çareserkerdişê mesele tênêgêrayî. Eqsê ci hêrişanê dewleta tirke verî de bêveng mendî û bi nê hawayî bîyî sebebê koçkerdişanê neweyan.  Multecîyê sûrîyeyîjî hetê dewleta tirke ra sey hacetî şuxilîyenê. Seba ke verê ney bêro girewtene sey Îdareyê Xoserî berê ma tim nînan rê akerde yo. 

Ewro 1 mîlyon û 100 hezar multecîyê sûrîyeyîjî erdê ma ser de ciwîyenê. Herêmanê Îdareyê Xoserî de 20 kampê multecî û koçberan est ê. Îdareyo Xoser bêmabên xizmetanê xo resneno nînan. Multecîyî zî wazenê kampanê ma de biciwîyê. Çunke Îdareyo Xoser giranîye dano heqan û rûmetê merdiman û tim multecî û koçberan paweno. Coka ma buroyê îrtîbatî û kampî ronayî.''

Ehmedî îfade kerd ke hêz û rêxistinê mîyanneteweyî paştî nêdanê Îdareyê Xoserî la teyna Îdareyo Xoser seba ke multecîyî abigêrê wareyanê xo xebatan keno. Ehmedî vat: ''Hêzê mîyanneteweyî herinda ke paştî bidê projeyanê agêrayîşî, verê hêrişanê dewleta tirke ya îşxalkere akenê. Hêrişê dewleta tirke benê sebebê koçkerdişan. Dewleta tirke herêmanê îşxalkerdeyan de teberî ra merdiman ano û cakeno. Bi nê hawayî zî demografîya herême vurneno.''