Dewleta tirke ya îşxalkere herêmanê Rojawanê Kurdîstanî de îstasyonanê awe û ceyranî, dezgehanê xizmetî û binawanîye bêmabên dana bombayan ver. Hêrişanê dewleta tirke ra xeylêk herêmê Rojawanî bê awe, ceyran û xizmetî mendî. 

Hemsereka Îdareyê Xoserî Bêrîvane Xalid ANFyî rê hêrişê dewleta tirke ya îşxalkere ercnayî û qala texrîbatanê nê hêrişan kerde.

Bêrîvane Xalid da zanayene ke dewleta tirke wazena ke şarê herême aramî û îstîqrar nêvîna û vat: ''Dewleta tirke herême de tersî vila kena û wazena projeyê Îdareyê Xoserî çin bikera. Şarê ma vêşanîye de têrî yeno verdayene. Dewleta tirke kena ke wa şarê herême bi temamî koç bikera û qesasê DAÎŞî ma ra bigêra.''

Bêrîvane Xalid pare kerd ke hêrişanê dewleta tirke de texrîbatê pîlî virazîyayê û vat: ''Îdareyo Xoser her çî ra ver armanc keno ke xizmetê şarî bikero, şertanê şarî weş bikero. La hêrişanê dewleta tirke ra herême de texrîbatê cidîyî est ê. Xeylêk xizmetî hêrişan ra vindertî. Bi taybetî îstasyonê awe, ceyran û petrolî vinderte yê. Hetê bînî ra vera embaranê xida zî hêrişî est ê. Nê hêrişî do bibê sebebê xerabîyayîşê asayîşê herême. Çunke dewleta tirke noqtayê Hêzanê Asayîşê Zereyî kerdî hedefê xo. Ancî dormeyê zîndananê cerganê DAÎŞî zî dîyeno bombayan ver. Beno ke DAÎŞ newe ra xo rêxistin bikero.

Êlula 2023yî ra nata dewleta tirke raya çarine wina hêrişê herême kena. Ma sey Îdareyê Xoserî çarçewa îmkananê xo de kenê ke hetkarîya şarê xo bikerê la heyf ke îmkanê ma sînordar ê. Xora tedbîrê ma est ê la hêrişî nêvindenê. Coka prosesê holkerdişî zî bi sîstematîkî nêşino. Ancî zî heta destê ma ra bêro ma do hetkarîya şarê xo bikerê.''

Bêrîvane Xalid ard ziwan ke şarê Rojawanê Kurdîstanî verê hêrişanê dewleta tirke de tewirêkê qerardarî mojnenê ra û vat: ''Şarê ma xoverdayîş de isrardar ê. Şarê ma erdê xo û welatê xo ra hes kenê. Îdareyo Xoser zî nê tewirê şarî ra moral û hêzî gêno. Cinîyî nê prosesî de zî serkêşîya xoverdayîşî kenê. Seba ke ma destkewteyanê şarê xo bipawê do xoverdayîşî berz bikerê û paradîgmaya Neteweya Demokratîje bipawê. Ma do bi şar û cinîya azade Şorişê Rojawanî ser bivisnê. ''