Sereka Heyetê Cinîyan ê Îdareyê Xoserî Adalete Omer derheqê hêrişanê artêşa tirke ya îşxalkere de ANFyî rê qisey kerd. 

Adalete Omer ard ziwan ke hêrişê artêşa tirke ya îşxalkere yê vera Rojawanî hertim zêdîyenê û vat: ''Dewleta tirke 5ê teşrîna verêne de vera şarê ma reyna hêrişî dayî destpêkerdene. Nê hêrşan de warê sivîlan û çimeyê debare ameyî hedefkerdene. Dewleta tirke ha hêrişê sivîlan kena. Dewleta tirke pê nê hêrişan armanc kena ke şarê herême bida koçkerdene û demografîya herême bivurna. Dewleta tirke wazena cergan herême de cabikera. Dewleta tirke Girê Sipî, Efrîn û Serêkanîye de nê çîyî kerdî.

Şarê Rojawanî îdareyê xo keno, sîstemê ci yo xoser est o. Dewleta tirke projeyê neteweya demokratîke ra tersena coka herêma ma kena hedef. Hêzê mîyanneteweyîyî zî goreyê qanûnanê xo tênêgêrenê. Dewleta tirke huqûqo mîyanneteweyî binpay kerdo. La hêzê mîyanneteweyî verê dewleta tirke û hêzanê peyê ci de bêveng ê. Hêzê mîyanneteweyîyî zî rêxistinî, sîstem û xoserîya şarê ma ra tersenê coka rayîr danê hêrişanê dewleta tirke.''

Adalete Omer bale ante xoverdayîşê şaranê Rojawanî ser û vat: ''Herême de bi armancê îşxalê neweyî hêrişî zêdîyayî. La şarê ma vera nê hêrişan qetî do erdê xo terk nêkero. Şarê ma wayîrê ruhê têkoşînî û şorişî yo û rêxistinîya ci est o. Şarê ma wazeno bi hawayêkê azadî biciwîyo coka xo ver dano. Têkoşînê şarê ma do pîlêr bibo.''