Qamişlo de semedê Seyîd Evran û Fermandarê YPGyî Aslan Qamişloyî mersîmê definkerdişî ame rganîzekerdene. Herêmanê cîya cîyayan ê Rojawanî ra bi  hezaran kesî tewrê merasîmî bîyî.

Merasîmo ke Şehîdgehê Şehîd Delîl Saroxanî de ame kerdene, saetanê serê sibayî de dest pêkerd. Dezgehê sîvîl, leşkerî û çapemenîye, eşîrê kurd û ereban, partîyê sîyasîyî, îdarekarê Îdareyê Xoserî, roşnvîr, hemrayê şehîdan tewrê merasîmî bîyî. Cenazayî taxa Enteriyê ra ameyî girewtene. Hemrayanê wird şehîdan cenazayî bi vilikan, beyraqanê YRA û YPGyî kiriştî şehîdgehî.

Merasîmî bi rêzgirewtişî dest pêkerd. Dima ra endamê Meclîsê Şehîdan ê Qamomişloyî Şêro Şeroyî qisey kerd. Şeroyî vat: "Ma têkoşînê şehîd Aslan û Seyîdî selam kenê û soz danê ke ma do têkînê înan bidomnê û xayînan ra hesab bipersê."

Hemserka TEV-DEMî Rûkene Ehmed zî vat: "Hende kesî dormeyê şehîdan de ameyî têhet, no zî mojneno ke no şoriş do bireso armancê xo. Seyîd Evranî têkoşînê xo de bi qelem, kamera û xebatanê çapemenîye têkoşînê şarî û fedakarîya şehîdan mojna ra. Seyîdî sînorê zordarîyan nas nêkedêne. Raştîye vatî û xeylêk rojnamegerî bi nê prensîbî perwerde kerdî. Aslan Qamişloyî zî şorişê Rojawanî de keda pîle daye û bi wiyayîşê xo ameyêne naskerdene. Eke ma wazenê wayîrê şehîdanê xo bivejîyê, gerek ma destûr medê xayînî herra ma de biciwîyê. Ganî şarê ma yo welatperwer erdê xo cameverdo û vera şerê taybetî vindero. Paşîtya ma şarê ma ra pêt a. Tay partîyî kenê ke mabênê  şarî û Îdareyê Xoserî bixeripnê, ma nê kayana mexapîyê." 

Hemraya Seyîd Evranî Stêrk Guloya ke bi nameyê Yewîya Çapemenya Azade (YRA) qisey kerd, bi yaderdişê şehîdan dest pê qiseykerdişî kerd. Gulo vat: " Şehîd Seyîd embazê mi yê 30 serran o, Şehîd Aslan zî hemrayê mi yê 25 serran o. Seyîd Zapî ra şi Qendîl û ûca ra vazda Zagrosî. Şervan, fermandar û rojnameger bi û rojêke zî rayîrê heqîqetî ra peyser game nêeşte.Ma do şehîdan çirey xo vîra mekerê û çekê înan erdî de nêverdê."

Badê qiseykerdişan belgeyê şehadetî yê Seyît Evran û Aslan Qamişloyî ameyî wendene teslîmê embazê înan bîyî. Dima ra hemrayanê wird şehîdan cenazayî doşê xo de kirişt û defin kerdî.