Hêriş û îşxalê dewleta tirke û cerganê ci yê vera Rojawanî dewam kenê. Dewê sînorê Eyn Îsayî tewr zêde tesîrê nê hêrişan de manenê. Roniştoxê dewan ê ke pê zîretî debarê xo kenê rîxmê bombardûmanan neçare manenê ke şorê hêgayanê xo.

Rencberanê dewa Leqleqwa ya Efrînî derheqê zehmetîyanê xo de qisey kerd. Dewa Leqleqwa qasê 8 kîlometreyan cayanê ke binê îşxalê dewlete tirke de yê, ra dûrî ya. Dewijêkê rencberî yê bi nameyê Ehmedî vat: ''Ez 40 serrî yo tîya de ciwîyena, rencberî kena. Ma pê citkarîye debarê xo kenê. Na raştîya ma ya. Ma do erdê xo nêverdê îşxalkeran. Cergî seba ke dizdîye bikerê dewleta tirke reyde hemkarîye kenê.''

Dewijê bînî yê bi nameyê Îsayî ard ziwan ke o citkarîye musneno domananê xo û eke dibistane mabên bida domanê ci zî ey reyde xebitîyenê.

Dewije Vehîda Mustafa vat: ''Dewleta tirke û cergê ci her roje dewa ma ser o bombayan varnena. Dewleta tirke seba ke aramîya ma biherimna ma reyde şer kena, pê zorî sivîlan danê koçkerdene. Nê erdî ê ma yê. Ma do nînan îşxalkeran rê nêverdê.''