28ê sibate de hêrişê dewleta tirke yê îşxalkerî de şerwanê Hêzanê Asayîşê Zereyî yê Meclîsê Leşkerî yê Sûryanîyan (Sotoro) Mizefer Mihemed Mihemed, Cemîl Hina Hina û Şerbel Neîm Selîba şehîd bibî.

Seba hîrê şehîdan Merkezê Ciwananê Şorişgêran ê Qamişloyî de merasîmêk ame kerdene. Roniştoxê Dêrik û Girkê Legê û xeylêk endamê dezgehan û rêxistinan tewrê merasîmî bîyî.

Endama Meclîsê Keyeyanê Şehîdan û dadîya Şehîde Hevrîne Xelef Suade Mistefa merasîm de ard ziwan ke ê do tim destkewteyanê şehîdan bipawê.

Endamê Sotoroyî Akad Hena pare kerd ke ê sey hêzanê şarê xo soz danê ke vera hêrişan û îşxalî tim erkê pawitişî bîyarê ca.

Endamê PYDyî yê Dêrikî Mutîi Elî zî îfade kerd ke her hêrişê dewleta tirke de Rojawan hîna bihêz beno.

Dima şehîdnameyî teslîmê keyeyanê şehîdan ameyî kerdene. Cenazayê Cemîl Hina Hina û Şerbel Neîm Selîba Goristanê Mar Yaqûbî yê Dêrikî de û yê Mizefer Mihemedî Goristanê Şehîd Xebat Dêrikî de ameyî definkerdene.