Dewleta tirke seba ke verê operasyonê artêşa Sûrîye û Rûsya yê vera Îdlîbî bigêra, taktîkanê neweyan ceribnena. Ame parekerdene ke dewleta tirke unîformeyê artêşa tirke cergan rê kerd û wazena ke înan Îdlîb bipawê. Artêşa tirke 10 rojanê peyênan de qasê 50 wesayîtî sewqê herême kerd.

Goreyê xeberan cergê komanê Sûltan Mûrad,Tumena Hamza, Sultan Suleyman Şahd û Mûntasir Bîlallahî bi unîformayanê artêşa tirke şîyî Îdlîb. 

Ame zanayene ke artêşa tirke serê menga sibate de seba ke averşîyayîşê rejîmê Sûrîye û Rûsya vindarna 4 bendanê Serqîbî de nê kesî cakerdî. Dima ke Seraqîn kewt zaf cergan xo ant nê bendan û bi wesayîtanê artêşa tirke tehlîye bîyî.

Kayo Newe: Unîforma

Destpêkê şerê Sûrîye ra heta nika zaf endamê MÎTî û endamê daîreya şerê taybetî yê tirkan unîformayanê komanê cergan ê herême ser o xebitîyenê. La yeno dîyene ke dewleta tirke Îdlîb de unîformeyê xo cergan rê kena û wazena herême de hêzê xo xurt bikera.

Ajansê xeberan ê Reutersî vizêr bi xeberêke pare kerd ke 40 fermandarê cerganê artêşa tirke û MÎTî Reyhanli de kom bîyî û vat: ''Pêvînayîşê bi Moskova bênetîce mendî, xo seba rewşa xirabe amade bikerê.''

Selahîyetdarêkê Tirkîya zî heman xebere de vatbi ke: ''Sûrîye û Rûsya pêro peymanî binpay kerdî û ganî ê xo seba na rewşe amade bikerê. Sûrîye de hînî dewirêko newe dayîya destpêkerdene.''

Sewqîyatê Leşkerî Dewam Keno

Keyeyê Çimdarîye yê Heqanê Merdiman ê Sûrîye pare kerd ke artêşa tirke hewteyêkê peyênî de bi 240 wesayîtan sewqîyatê leşkerî kerd û hûmara leşkeranê ci yê Îdlîbî bîye 5000.
Goreyê texmînan menga sibate ra heta nika artêşa tirke tewr tay qasê hezar û 480 wesayîtan sewqîyatê leşkerî kerd.