Hemsereka Meclîsê Sûrîyeya Demokratîke (MSD) Emine Omer  bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan cewab da persanê ma.

Qiseykerdişê Emine Omer ra qismêk wina yo:

''Konseptê şerê vera kurdan seserre verî dest pêkerd û hema dewam keno. Herra Kurdîstanî mabênê çar welatan de ameye parekerdene, parçekerdene.  Rixmo ke seserre ravîyerte nê parçebîyayîşî dejê giranî afirnayî.  Polîtîkayê qirkerdişî yê seserran dewam kenê.

Verî ke dewleta tirke Efrîn, Girê Sipî û Serêkaniyê îşxal kerdî nê cayan de cinîyan serkêşîye kerdêne. Rêxistinbîyayîşê cinîyan aver şibi, dezgeh û sazgehanê Îdareyê Xoserî de cinîyî aktîf bî, dezgeh û sazgehê cinîyan ameybî rêxistinkerdene. Çi heyf ke badê îşxalê dewleta tirke vera cinîyan polîtîkayanê leyminan dest pêkerd. Heqê ke bi têkoşîn û xoverdayîşî ameybî destfînayene destê înan ra ameyî girewtene.  Vera cinîyan qirkerdiş, remnayîş, tepiştiş û tecawuzî ame kerdene. 

Hetê bînî ra cinîyê Rojawanî têkoşîn kenê, komelî rê serkêşîye kenê  û wazenê cinîyê ke waranê îşxalkerdeyan de yê, înan rê nefesêk bidê dayene. No têkoşîn û xoverdayîş çend xurt beno hêrişê dewleta tirke zêdîyenê. Îradeyê hêzdarî yê cinîyan ra, komelê demokratîkî ra tersenê. Coka vera cinîyan polîtîkayanê şerê taybetî fînenî dewre. Têkoşîn çend xurtêr beno seba ke cinîyan bikerê bêveng qirkerdişan kenê. Cinîyê ke komelî rê serkêşîye kenê, înan hedef genê. Hêzê hegemonî nêwazenê komelo demokratîk bêro înşakerdene. Zanê ke bi komelê demokratîkî şarî benê azad.

Hemleya ke badê qetilkerdişê Jîna Emînî Rojhelatê Kurdîstanî û Îran de bi slogana ‘Jin jiyan azadî’ dîyaye destpêkerdene, herême de hetê cinîyan ra ameye wayîrvejîyayene.  Cinîyî tim dewlete û komelî ra şîdet vînenê. Ganî cinîyî zafêr paştî bidê na hemle. Rojawan de paştdayîşo pîl dîya hemle û hema zî dewam keno. Ma do tim vera şîdetê serê cinîyan vinderê, qebul mekerê. Têkoşînê cinîyan çend xurt beno, şîdetê vera cinîyan zî zêdîyeno. Şîdetê serê cinîyan pabesteyê kaos û şeran o.  Şerî de ziraro tewr pîl cinîyî vînenî. Ganî cinîyî vera şerî vinderê. Peyê dewaya azadîye de vazdê.

Emser hedefê ma o yo ke ma şerî biqêdînê, cinîyan bikerê azad û komelê demokratîkî biafirnê. Cinîyî ganî têkoşînê xo xurtêr bikerê. Ma dejê pîlî antî û hema zî ancanê.  Ganî cinîyî hêzê xo kanalêk de kom bikerê, bibê yew. Cinîyî çend pîya têbigêrê hende lez eşkenê biresê heqanê xo û komelî de bedilnayîşî biafirnê. Coka ganî cinîyî bibê yew û têkoşînê xo xurtêr bikerê.''