Serrêke verê cû herêma Baxozî ya Dêra zorê de cergê DAÎŞî netîceya hemleya serkewte ya hêzanê QSD, YPG û YPJyî de hetê leşkerî ra ameyî çinkerdene. Dêra Zorê tewr tay 5 serran binê zorbazîya DAÎŞî de mende û bi hezaran merdiman neçarîye ra tira koç kerd. Dêra Zorê hêdî hêdî yena xo ser û şarê ci agêreno. 

Hemleya çinkerdişê cerganê DAÎŞî de zaf şerwananê YPJyî cepheyanê vernîyan de ca girewt û ganê xo feda kerd. No tewirê çêrî tesîrê cinîyan ê herêmî keno. Bi desan cinîyê erebî zî tewrê YPJyî benê. Serrgêra 1. ya çinkerdişê DAÎŞî de cinîyê erebî yê herêma Dêra Zorê verê xo danê terefanê YPJyî. 5 cinîyê erebî qezayanê cîyayan ê Dêra Zorê ra tewrê YPJyî bîyî.

Herdi wayê bi nameyê Sena û Cemîla yê ke birayêkê înan hetê DAÎŞî ra ame înfazkerdene û birayê înan o bîn zî tewrê şehîdanê QSDyî bi, sebebê tewrbîyayîşê xo wina îfade kenê: ''Birayêkê ma qesasê birayê ma yê bînî girewt û xatirê xo waşt. Nê ma rê zaf tesîr kerd. Bi nê hawayî ma bire daye ke tewrê YPJyî bibê. Ma hem rêçê birayê xo de qesasê birayanê xo gênê hem zî seba ke sey cinîyêke xo şinasnenê û pêro cinîyan pawenê.''

Emele û Zeynebe zî di way ê ke verê xo da YPJ. Ê zî qala hîkayeya xo ra wina kenê: ''Ma destê DAÎŞî ra zulmêko pîl dî. Ma neçare mendî ke koç bikerê. Wexto ke ma eşnawit Dêra Zorê azad bîya û DAÎŞ qedîyayo ma cade agêrayî. Nika ma YPJ de ca gênê. Ma pê tewrbîyayîşê xo zaf sereberz ê.Ma hêdî hêdî musenê ke xo senî awan bikerê û bipawê.''

Şerwana bi nameyê Amara zî vat: ''Ma domanîya xo de zulmê DAÎŞî dîye. Her çi qedexe bi. Seba cinîyan rewşe giranêr bîye. La ewro ma bihêz ê, ê qels ê. YPJ cayêko ke ez eşkena tede xo îfade bikera, dejanê xo derman bikera. Ez zaf kêfweş a ke tewrê YPJyî bîya.''