Vervatoxa Kongreya Starî Evîn Siwêde derheqê amadekarîyanê kongre de cewab da persanê ma. Siwêde da zanayene, înan partîyanê sîyasî, meclîsê herêmanê ke ameyê xelisnayene, cinîyan ê Armenî, Tirkmen, Asûrî, Çeçen, Suryanî, Kurd û Ereban reyde munaqeşeyî kerdê û ard vîrî ke, mîyanê şerê 7 serran ê Sûrîye de tewr zêde şîdet bi cinîyan ameyo kerdene.

Siwêde da zanayene ke Sûrîye de7 serrî yo ke şer esto, bi taybetî cinîyî bîyî hedefê şîdetî, ameyî koçkerdene, dejê tewr giranê cinîyan, dayîkan antî û vat, “Rixmê naye zî nêmeyê xebatî hetê cinîyan ra ame rayra berdene. Na rastîye zî mojnena ke cinîyî hêzê serkêş ê. Nika zî seba pawitişê destkewtîyan ganî mîyanê cinîyan de yewîyîya hempare biba. Na çerçawa de munaqeşeyê ma yê cinîyanê herême reyde dewam kenê.”

Vervatoxa Kongreya Starî ard ziwan ke înan kombîyayîşê xo yê destpêkî yo hempar 13'ê Adare de viraşto û vat, “Sazgehanê cinîyan ra yewo ke tewrê ci bibi Kongreya Starî bîye. Ma waşt ke no projê tena projeyê Kongreya Starî nêbo û her kes xo nê projeyî ra berpirsîyar bivîno. Coka Kongreya Starî sewîyeya serkêşîye de tewrê kombîyayîşî bîye, dîwan ame awankerdene û munaqeşeyî ameyî kerdene. Kombîyayîşê destpêkî de nameyê nê têhetameyîşî ame panayene û nameyê Meclîsê Cinîyan ê Vakur-Rojakewtena Sûrîye ame bewlîkerdene. Komîteyêka amadekarîya ke 9 kesan ra yena pê, ameye awankerdene. Kongreya Starî tewrê komîte bîye.

Kotaya beşdarbîyayoxan  goreyê meclîs, sazgehî û partîyan do bêra amadekerdene. Heqê delegeyan esto ke seba nê koordînasyonî bêrê weçînayene. Koordînasyon 17 kesan yeno pê. Koordînasyon do dimayê kongre nê meclîsî komb bikero û derheqê rewşa cinîyan ê Vakur-Rojakewtena Sûrîye, cayê cinîyan ê mîyanê cimatî û komîteya huqûqî ya ke bêra awankerdene munaqeşe bikerê. Meclîs do xebatê xo bê mabên bikero, goreyê waştişanê cinîyan mîyanê partî û sazgehan de têgêrayîş bikero û nê waştişan pêşkeşê meclîsî bikero.”