Hetêk ra gefê dewleta Tirkî ê binê nameyê ‘herêma asayîşî’ de ke wazena Rojawan-Vakur û Rojakewtena Sûrîye îşxal bikero dewam kenê û hetêna ra zî amadekarîyê şaranê herême yê hemverê hêrişêkê muhtemelî dewam kenê.

Girê Sipî de, ke dewleta Tirkî hêzê xo yê leşkerîyî sînorî ê ser o kerdê zêde, şarê herême bi rojan o binê xeymeyan de çalakîya mertalanê ganeyan kenê. Ciwanê Kurd, Ereb, Ermen, Tirkmen ê Girê Sipî anê ziwan ke do îşxalê dewleta Tirkî çi rey qebûl nêkerê û heta peynî hemverê îşxalî de xo ver bidê. Ciwanan ANF’yî rê qisey kerd û vat ke Tirkîya wazena fîtne bifîno mabênê şaran, bi nê hawayî bireso tayê çîyan, labelê ê hemverê îşxalî de yewwucûd ê.

 Ma do Rayîr Nêdê Îşxalî

Ciwananê Ermenîyan ê Girê Sipî Kokeb Mercîyanî vist vîrî, verê nikayî gama ke bajar hetê çeteyanê DAÎŞ’î ra amebi îşxalkerdene sere de Ermenîyan şarê herême dejê giranî antî û ê nêeşkayêne şirê dêranê xo. Mercîyanî vat, “verê nikayî zulmêko pîl ro ma ameyêne kerdene. Labelê nê çend serranê peyênan de ma huzûrî de bî. Nika dewleta Tirkî gefê îşxalî ma rê wanena. Ma çi rey îşxalî qebul nêkenê û ma do hemverê îşxalî xover bidê. Ma do rayîr nêdê îşxalî.

Hemverê Îşxalî de Ma Yewwucûd ê

Cinîya ciwane ya Erebe ya Girê Sipîyije Nofe Hecî zî vat ke hemverê îşxalî înan her tewir amadekarîyê xo kerdê û vat, „Şarê herême yê nê doran xover danê. Erdogan wazeno erdê ma îşxal bikero, ma zî hemverê nê de çalakîya mertalanê ganeyan virazenê. Ma do rayîr nêdê ke erdê ma reyna bêrê îşxalkerdene. Sere de cinîyî ma do erdê xo, namûs û bajarê xo heta peynî bipawê. Sere de cinîyî û ciwanî her kes hemverê îşxalî de amadekarîyanê xo keno. Ma do îşxalî qebul nêkerê. Tirkîya tîya wazena fîtne bifîno mabênê ma û tayê çîyan bi dest bifîno, labelê ma heme hemverê îşxalî de yewwucûd ê.“

Ma do Îşxalî Qebul Nêkerê

Ciwano Kurd o Girê Sipîyij Ferhan Mistefayî zî vat ke ê do îşxalî qebul nêkerê û hemverê na yewe de xover bidê û vat: „Dewleta Tirkî seba îşxalê erdê ma firsendî dima ya. Labelê ma îşxalî qebul nêkenê. Dewleta Tirkî wazena mabênê şaranê herême de şer vejo û îradeyê tîyayî raste ra wedaro, wazena zihnîyetê xo yê yewperestî ferz bikero. Labelê bi nameyê ciwananê şaranê herême ma do îşxalê dewleta Tirkî çi rey qebul nêkerê û heta peynî hemverê îşxalî de xover bidê.“