Serkêşîya YPJyî de hêzê QSD û Hêzanê Asayîşê Zereyî 27ê çeleyî ra nata Kampa Holî de vera hucreyanê DAÎŞî 'Operasyonê Merdimatîye û Asayîşî' kenê. Fermandaranê QSDyî ra Serdar Cûdîyî ANFyî rê qala operasyonî kerde.

Qiseykerdişê Cûdîyî ra tay noqtayê girîngî wina yê:

''Rojawan de şarî bi hawayêkê aramî pîya ciwîyayêne û înan ancî pîya Îdareyo Xoser na ro. No zî pê dewleta tirke nêşi. Dewleta tirke destpêkê Şorişê Rojawanî ra nata hêrişê herême kena û armanc kena ke QSDyî bin bivisna. La peyê hêzê QSDyî de şar est o. Dewleta tirke coka nika hêrişê waranê sivîlan kena ke wa şar erdê xo biterikno. A raşte DAÎŞ seba dewleta tirke firsendêko pîl bi. Dewleta tirke çîyo ke waştêne bikera, kerd ke bi destê DAÎŞî bikera. 

Hêrişê dewleta tirke zî tewr zaf DAÎŞî rê fayde kenê. Ma key safhaya hîrêyîne ya Operasyonê Merdimatîye û Asayîşî daya destpêkerdene dewleta tirke de dest pê hêrişê herême kerd. Dewleta tirke nêwazena ke DAÎŞ çin bibo. DAÎŞ dewleta tirke ra paştî gêno. Beno ke DAÎŞ wextê verê ma de hêrişanê pîlan ancî bikero.

Kampa Holî seke akademîya DAÎŞî ya. Kampa Holî de bi ferasetê DAÎŞî neslê neweyî yenê weyekerdene. DAÎŞ de domanî bi ferasetê 'DAÎŞî ra ber her kes kafir o, dişmen o' pîl benê. Nika Kampa Holî de 50 hezar endam û keyeyê DAÎŞî est ê. Nê hemwelatîyê welatanê cîya-cîyayan ê. La seba ke DAÎŞ semedê înan tehluke yo nê welatî hemwelatîyanê xo yê DAÎŞî nêbenê. Wazenê nê 50 hezar kesî tim Kampa Holî de bimanê la ardimê ma zî nêkenê. 

Domanê DAÎŞî Hol de bi madeyanê ke tirkî nusîyayê, perwerde vînenê. Xora cergê DAÎŞî serê Tirkîya ra verê xo danê herêma ma. Dinya naye zanena la mudaxele nêkena. Ganî sere de Koalîsyono Mîyanneteweyî pêro dinya têkoşînê vera DAÎŞî de paştî bidê ma. 

9 rojî yo kampe de operasyon dewam keno. Semedo ke zimistan o hêzê ma zehmetî ancenê la reyna zî bi fedakarî têgêrenê. Hêzê ma safhayanê bînan de zî na safhaya hîrêyîne de goreyê qanûnanê mîyanneteweyîyan têgêrenê. Hemle de xeylêk çekî ameyî destvistene. Ancî ma dest na xeylêk belgeyan ser ke nînan de bi zelalî yeno nuştene ke dewleta tirke cerganê DAÎŞî şuxilnena. Goreyê belgeyan cergî Serêkanîyê û Girê Sipî de yenê pêserkerdene û erşawîyenê tîya. Kampa Holî binê kontrolê ma de ya la herêmê îşxalkerdeyî yê sey Girê Sipî û Serêkanîyê binê kontrolê dewleta tirke de yê. DAÎŞ nê cayan de bi rehetî xo rêxistin keno. Erkê ma zehmet o la ma qerardar ê ke heta ke kokê DAÎŞî bîyarê xo ver bidê.

Çar serran ra nata Îdareyo Xoser teyna îhtîyacanê kampe peyda keno. La îmkanê Îdareyê Xoserî werte de yê. Ganî dewlet û rêxistinê mîyanneteweyî hetkarîya Îdareyê Xoserî bikerê. Cergê Kampa Holî teberî ra fermanan gênê. Dewleta tirke kena ke DAÎŞî gandar bikera û plananê xo yê neweyan bi DAÎŞî bîyara ca. Ma sey QSD û MSDyî tim amade yê ke seba asayîşê herêma xo têkoşînn bikerê. Nika rewşe wina ya. Dima ke operasyonê ma biqedo ma pêro doneyanê xo do pare bikerê.''