Dan Burke û Sam Newey Ukrayna de şerê vera hêzanê Rûsya de dinyaya xo bedilnaye û welatê xo de ê hetê medya ra sey qehremanî ameyî îlankerdene.

Cenazaya Dan Burkeyî çend rojî verî rojhelatê Ukrayna de ameye dîyene. Sam Neweyî zî rojhelatê Ukrayna de dinyaya xo bedilnaye.

Mergê nê wird îngilîzan çapemenîya welatê înan de zaf veng vet. Xeylêk xebetan de Borke û Newey sey 'şerwananê çêr û fedakaran' ameyî pênasekerdene.

Çîyo balkêş no yo ke Dan Burke seba ke refanê YPGyî de vera DAÎŞî şer kerdo hewt mengan tepişte mendbi. Sam Newey zî rixmo ke 19 serre bi û qetî nêşibi Rojawanî amebi cezakerdene.

Kekê Sam Dan Neweyo ke bi xo Rojawan de şer kerdbi derheqê babete de qisey kerd û îfade kerd ke wird enternasyonalîstî zî qehreman bîyî.

Neweyî vat: ''Şarê Rojawanî mabênê DAÎŞî û welatanê Ewropa de bendêk bîyî. Nînan ra nêbîyêne DAÎŞî hîna zaf dej û kaos viraştêne. Nika heman çi seba Ukrayna zî vajîyeno. No têkoşînê ma yê pêroyînan o.''

Dan Burke 2017 de şibi Rojawan û dima ke vera DAÎŞî şer kerd 2019 de agêrabi welatê xo. La Îngilîstanî o bi 'terorîzmî' sûcdar kerd. Dan Burke û Sam Newey pa çar embazanê xo ameyî muhakemekerdene.

Sam Newey seba ke kekê xo rê 150 sterlin şawitbi bi îdîaya 'fînanskerdişê terorîzmî' ame sûcdarkerdene. Dan Burke zîndan de hewt mengan tepişîya û tay organanê medya ey rê vat 'Dano Jîhadî'.

Sam Newey û babîyê ci pê kefaletî vera dîyayî. Înan karê xo vînî kerd, polîsan çend reyî eşt keyeyanê înan ser û odayanê înan ê dibistanî ser.

Sam Neweyî 31ê tebaxe de Ukrayna de dinyaya xo bedilnaye. 

Torra Paştdayîşî ya Kurdîstanî derheqê mergê wird enternasyonalîstan de eşkerayîye daye û vat: ''Wird enternasyonalîstî sey qehremanî do bêrê yadkerdene. La verê cû wirdî zî raştê tacîz û zulmê Qralîyetê Yewbîyayeyî ameybî. Paştdayîşê Qralîyetê Yewbîyayeyî yê şerê Tirkîya yê vera kurdan îdîaya hukmatê Qralîyetê Yewbîyayeyî yê serê demokrasî dîyarkerdişê heqê qederê xo û paştdayîşê heqan keno babetêka yarîyan.''