Rojanê giranan ê şerê Kobanê de bi vengêko berz qîrayêne û vatêne “Ma do ci ra dest ranêverdê” dest ci ra ranêverda û xo ver ro da. Bi keyeyê xo reyde xoverrodayîşî de ca girewt. Nika zî sey roja verêne bi bawerî û îrade mîyanê şorişî de ca gêna.
Ma a xoverrodayîşî Kobanê de nas kerde. Seke her şer fermandarê xo xeliqneno, eynî wextî de qehremananê ke nameyê înan zêde nêno zanitene zî xeliqneno. Dayika Emîne zî qehremananê şerê Kobanê ra yew a…
Ma qalê Dayîka Emîne (Emîne Şêxo) kenî ya ke wexto ke DAÎŞ kewt mabênê bajar û zaf cayî vistî dest, xeta sînorî de kamerayan ra va “Ma canêverdanîme, ma YPG û YPJyî canêverdanîme.Heta ke dilopa gonîya ma biba ma peyê rêça înan de yîme.”
Rasta zî dest ci ra ranêverda, sînor de xo ver ro da, mîyanê bajarî de xo ver ro da, seba şerwananê birîndaran her roje werd viraşt û birînan rê bîye dermane. Ma a her tim verê kuçike de dîyêne. Her dolime de bi hêvî û bawerîye moral dayêne ma û seba şerwananê ke ci ra vatêne “domanê mi” rê werd viraştêne…
Dayika Emîne ya ke bi hemser, veyve, domanî û tornê xo yê bi hîrê mengîye binê bombardumanî de, mîyanê xoverrodayîşî ca de girewt, dima çar serran ma şîme dewa Gabeleke ya rojawana Kobanê de serdayena aye.
Sey rojanê tewr zehmet û giranan, reyna bi bawerî û hêvîye ver bi ma ameye. Ma Dayîka Emîna reyde derheqê rojanê verî û ewroyî de xoşeberêda xorîne kerde. Dayîka Emîne hêrişanê vera Kobanê sey “Roja Sîyaye”, Xoverrrodayîş Kobanê zî sey “Roja Rûmete” name kena.
Dayîka Emîne ard ziwan ke verê şerê Kobanê înan zaf şenik dest derge bi çekan kerdo û dima dîyayîşê rayberîya xoverrodayîşê YPG û YPJyî, qerar dayo ke hetkarî bidê domananê xo.
Dayîka Emîne vat: “Înan leşa xo seba ma kerdêne sîper. Wexto ke hovîtîya DAÎŞî ameye ma ser de, her çîyê ma xo rê kerdîbî helal. Teberê YPG û YPJyî qet çîyêde ma çin bî. Ma wextêk sînor de mendîme. Dima ke şerwanan pawitişê çend kuçeyan kerd, ma ameyî mîyanê bajarî. Çi destê ma ra ame, ma kerd. Leyê şerwananê xo reyde bîyayîş ma rê bes bi.”
ÇÎYÊKO ZOR O Û NÊBENO ÇÎN O
Dayîka Emîne wextê şerî de birîndaran de nîyadayo, înan rê werd pewto, cilê înan şutê û birînê înan têpîştê û wextêk ra dima seba ardimî venga veyva xo ya ke derbaze Pirsûsî bîya dayo.
Veyva Dayîka Emîne Hemîde bi dergûşê xo yê hîrê mengan yena û birîndaran de nîyadana. Hemîde seba ê wextî vat, “Wexto ke ê hevalî yenê vîrê mi ganê mi zaf dejeno.” Û bi zehmetîye ba zî çend vateyî ardî ra ziwan:
“Cayo ke ma mendêne de komêk zî hevalê bî. Heval Derwêş, Asmîn, Rojîne û Nûman bîyî. Mi hetkarîya înan kerdêne. Mi baş nêzanayêne ke ê çi kar kenê, la texmîn kerdêne ke ê mayin virazanê. Seba ke zaf qefelîyayêne, mi waştêne ke ez hetkarîya înan bikera. Vatêne, ‘Zehmet o, ti nêeşkena bikera.’ Mi zî vatêne ‘Wa bo, çîyêko zor o, nêbeno çin o’. Înan zî dergûşê min o Amedî reyde kay kerdêne û heta destê mi ra ame mi hetkarîya înan kerde.”
MA HÊZÊ XO YÊ TEWR GIRD RAYBER APOYÎ RA GÊNÎMÊ
Dayîka Emîne ke wextê şerî de hemserê xo zî cephe de bîyo, ard vîr ke dima serkewtişê Kobanê zaf bajarê Surîye ameyî azadkerdene û vatiş ard Erînî ser:
“Wa keyfê dişmenî nêro. Nêvajo ke ‘ma Efrîn girewt’. Ma do Efrînî cara înan rê canêverdanîme. Ma pêroyan bikeşê zî ma do Efrînî cara înan rê canêverdanîme. Bi 72 teyaran şewe û roje Efrînî ser o bombayan varnenê û dima zî vanê “ma Efrîn girewt’. Wa qet keyf nêkerê.”
Dayîka Emîne nika yew lajê xo mîyanê YPGyî de, kêna aye mîyanê asayîşî de, hemserê aye zî endustrîyê YPGyî de yo û a bi xo zî mîyanê karê HPCyî de ya. Dima ma ci ra persayîme, şima nê hêzê xo kotî ra gênê, aye zî vat:
“Ma felsefeya Rayber Apoyî ra hêzê xo gênîme. Vateyê ke ey 20-25 serrî raver ma ra vatî, teyna nêkewtî serê ma, serê zerrîya ma de zî ca girewt. Ma hêzê xo yê tewr gird Rayber Apoyî ra gênîme.”
