Dêrazor dima ke hetê QSDyî ra 2019 de DAÎŞî ra amebî azadkerdene tede dezgehanê cinîyan ra heta  bi şaredarî, komun, meclîs û rêxistinê komelê sivîlî ameyî awankerdene. Rêxistinê Komelkî yê Sivîlî zî nînan ra yê ke hetê TEV-DEMî ra ronîyayê.

Endama TEV-DEMî Seca El Huweydî derheqê babete de ajansê ma rê qisey kerd. Seca îfade kerd ke nînan hêverî awankerdişê sendîkayan ra dest pêkerd û 2023 de zî rêxistinê komelkî yê sivîlî ameyê awankerdene. 

Seca vat: ''Rêxistinê komelkî yê sivîlî binê sîwana Konfederalîzmê Komelê Demokratîkî de ameyî awankerdene. Nê dezgehî warê sîyasetî de wayîrê rolî yê, averşîyayîşê herême de wayîrê qiseyan ê û partîyanê sîyasîyan de têkilîye kenê. Sîstemê komelê sivîlî yê demokratîkî goreyê krîteranê demokratîkan ameyo awankerdene. Ma hêverî konferansê xo kerdî û goreyê biranê nê konferansan sîstem awan kerd.

Rêxistinê Komelkî yê Sivîlî perwerdeyê komelî de zî tesîrê pîlî kenê û komelî aver benê. Dêrazor de DAÎŞî û rejîmê Şamî rêxistinê xo awan kerdê û nê rêxistinî kenê ke herême de alozîye vejê. Rêxistinê Komelkî yê Sivîlî kenê ke verê nê kerdişan bigêrê û vera hêrişan û polîtîkayanê şerê taybetî komelî rêxistin bikerê.''

Seca bale ante ser ke Rêxistinê Komelkî yê Sivîlî cinîyan dekenê mîyanê komelî û vat: ''Destpêk de ma zaf zehmetîye ante. Eşîran nêwaştêne ke cinîyî mîyanê nê rêxistinan de cabigêrê. La ma karê xurtî kerdî û cinîyî zî tewrê xebatan kerdî.  Nika cinîyî nê rêxistinan de asta îdarekaran de xebitîyenê û hûmara cinîyan zaf a. 

Teyna mîyanê sendîkaya citkaran de 10 hezar cinîyî est ê. No tablo moralêkê pîlî dano ma. Cinîyî pîya xebitîyenê û ber anê. Ma do wextê verê ma de projeyanê hîna pîlan virazê û îdare bikerê. Ma goreyê felsefeya Rayber Apoyî projeyê neteweya demokratîke aver berê.''