Goreyê xebera ANHA cerganê dewleta tirke dewa Racoyî ya qezaya Mabata ya Efrînî de 8 sivîlî remnayî û keyeyan û merdimanê înan ra fîdye waşt.

Nameyê kesanê ke ameyî remnayene wina yê: Elî Hemo, Husên Şêxo, Ezîz Şêxo, Betal Mihemed Şêxo, Heysem Remzî Hecî Hemo, Henîf Arif Şerê, Mihemed Birîm û Henîf Henan.

Çimeyanê herêmîyan eşkera kerd ke Henîf Henan û Mihemed Birîmî bedelê fîdye ra dima ameyî veradayene la aqîbetê ê kesan ê bînan nêzanîyeno.

Dewa Meimila ya Mabata de zî reyna xeylêk sivîlî hetê dewleta tirke ra ameyî remnayene ke nameyê nînan wina yê: Lawend Umer Simo (20), Mihemed Menan Birîm (32) û Ciwan Şukrî Umer (20).

Dewleta tirke 15 rojî verê cû zî domanêka kêna ya bi nameyê Meleke Nebîh Xalîl (16) remnabî û meyîtê kêna daristanê zeytûnan de amebi dayene.

Menga gulane de vejîyabî werte ke 11 cinîyê ke serra 2018î de ameybî remnayene 2 serran înan rê îşkence ame kerdene. 23ê nîsane de Girê Sipî de rîsipîyê êşîra ereban a Neîmî Şêx Înezan amebi remnayene. 4ê nîsane de zî mabênê dewanê Kopirlik û Evdokoyî de 3 sivîlî ameybî remnayene û înfazkerdene. Heman roje sivîlê bi nameyê Sileman Bekre zî reyna hetê hêzanê tirkan ra amebi remnayene.