Goreyê agahîyanê ke çimeyanê herêmîyan dayê cerganê dewleta tirke ya îşxalkere 3yê adare de qezaya Cindirêsî ya Efrînî de Îzet Xelo (67) remnayo.

Nê hîrê rojanê peyênan de Cerablus de zî 13 kesî ameyî remnayene. Ame parekerdene ke kesê ke ameyê remnayene Tirkîya de koçber bîyê la bi zorî erşawîyayê herême. Nê kesî wextê derbazkerdişê sînorî de seba ke xerac nêdayo cergan ameyî remnayene.

Qezaya Şîyê ya Efrînî de cergan dest na keyeyanê hîrê kurdan ser û kurdî keyeyê înan ra vetî. Goreyê agahîyanê çimeyanê herême nameyê nê kurdan wina yê: Seydo Hec Îbrahîm Şêxo, Hesen Mistefa Çolaq û Osman Ebdo Zelxa.

Goreyê rêxistina heqanê merdiman dewleta tirke ya îşxalkere destpêkê 2024î ra nata teyna Efrîn de 8 kesî qetil kerdê, 87 kesî remnayê û bi seyan darî birnayê.