Hêrişê dewleta tirke ya îşxalkere yê vera Rojawanî qesawetî zêdînenê. Rîyê hêrişê hewayî û bombardumanî ra cuyeya şarê herême binê tehdîtê girdî de yo. Goreyê zanayîşanê ke ma komîteya weşîye û dezgeh û sazgehanê eleqedaran ê Rojawanî ra girewtî hêrişanê aşmanê sibate û adare de 229 hemwelatîyî ameyî qetilkerdene û 311 hemwelatîyî birîndar bîyî. Na rewşe mojnena ke heqê merdimîyeyê û huqûqê normanê şerê mîyanneteweyîyî yenê binpaykerdene.

Qirkerdişan ra tayî wina yê:

11 çeleyî de hêrişê vera dewa Merebî yê Sirînê Kantonê Firatî de babî û di domanê ci ameyî qetilkerdene 5 kesî birîndar bîyî.

27ê çeleyî de meydanê bazarî yê bajarê Sirînê Kantonê Firatî pê droneyê çekdarî ame bombardumankerdene. Netîceya hêrişî de 13 kesî ameyî qetilkerdene û 12 kesî birîndar bîyî.

28ê çeleyî de bombardumanê vera dewa Um Hermelî yê Zîrganî de 1ê ci doman 3 kesî ameyî qetilkerdene û 9 kesî birîndar bîyî.

17ê adare de dewleta tirke ya îşxalkere bi droneyanê çekdar û çekanê giranan hêrişê dewa Berxbotanî yê Kobanê de qirkerdişêk kerd. Qirkerdiş de 7 domanî pîya dadî û babîyê înan ameyî qetilkerdene. Di ferdê keyeyî zî birîndar bîyî û înan ra yewe dima ra dinyaya xo bedilnaye û hûmara kesanê ke ameyî qetilkerdene bîye 10.

Avûkat Mistefa Şêx Muslimî vera hêrişan hêrsê xo ard ziwan û nê vatî: ''Dewleta tirke ya îşxalkere xeylê wexto bi hêrişê vera sîvîlan huqûqê mîyanneteweyîyî binpay kena. Reyna dezgeh û binawîyê herême yenê hedefgirewtene. Çimeyê debarî yê şarî yenê çînkerdene. Rixmê Pêkerdişê Cenevere dewleta tirke verê çimanê dinya Rojawan de sîvîlan hedef gena û qetil kena. Dewleta tirk û çeteyê ci herême de krîz û kaos afirnenê ke herême de şer dewam bikero. Gerek dezgeh û sazgehê mîyanneteweyîyî vera berpirsîyarîya xo bîyarî ca û şirê Tirkîya ser ke verê nê hêrişan bêro girewtene.''

Sûzane Oso ya efrînijî zî vera hêrişanê dewleta tirke nêrazîbîyayîş mojna û nê vatî: ''Hêrişê vera herême dewam kenê. Dewleta tirke bi nê hêrişan wazenê îradeyê şarî bişikno la şar rixmê qirkerdişan sereberz payra yo. Ma do vera hêrişan dahîna zaf têkoşîn bikerê.''

Yûsif Kutê yo qamişloyijî zî wina vat: ''Dewleta tirke bi hêrişanê xo yê vera herême wazena hem qesas bigîro hem hûzûr bixeripno. Kena ke projeyê Îdareyê Xoserî û pêkerdişê 8 madeyan sabote bikero. Dewleta tirke nêwezanê Sûrîye de hûzûr bibo wazena kontrolê herême bifîno dest. Her roja ewledê ma hêrişanê dewleta tirke de şehîd benî; şarî yenê qetilkerdene.''