Çeteyanê DAÎŞî 25ê hezîran a 2015î vera Kobanê hêrişo gird kerd. Hêrişo ke pê destê dewleta tirke ame kerdene de 233 kesan dinyaya xo bedilnaye û bi seyan kesî birîndar bîyî. Zafê înan cinî, tutî û extîyar bê. Pê xoverdayîşê şerwananê YPG û YPJyî Kobanê çeteyan ra ameye pakkerdene. Şahîdanê qirkerdişê Kobanê bi wesîleya serrgêra qirkerdişî qala hêrişî kerd.

Şahîdan ra Elî Xalêyo kobanêyij o ke hêriş de raştê guleyan ame. Elî Xelê vat: ''Nê qirkerdişî zerrîya ma de birîna girde akerde. Ma xelisnayîşê Sirînê pîroz kerdênê la ma dî ke çeteyê DAÎŞî kewtê bajar. Mihemed Hecî cayê mi de bi, înan tifing na ma ya. O şehîd bi. Ez zî wird çaqanê xo ra birîndar bîya. Ciranêkê mi waşt mi biresno nêweşxane la dormeyê ma ame girewtene. Dima ra ma yew korîdorî ra xelisîyayî. Dewleta tirke û çeteyanê ci waşt pê nê qirkerdişî şarê Kobanê qir bikerê. Şexsê şarê Kobanê de heme kurdî ameyî hedefgirewtene.''

Wehîde Şêx Nibî ya ke qirkerdiş de babî tutê xo vînî kerdî vat: ''Babîyê mi seba ke fitiranê Remezenî arê bido,  amebi keyeyê ma. Zaf qeflîya bi, waşt biney biarisîyo. Pede pede vengê tifingan zêdîyayêne. Mi vat teber de se beno, babîyê mi vat 'ez texmîn kena xelisîyayîşê bajarî pîroz kenê.' Dima ra vengê teqayîşê pîlî ame. Ma vejîyayî teber. Ma fam  nêkerd ke se beno. Vistewrê mi pa cînîya xo ameyî qetilkerdene. Çeteyan ma zî keyeyî ra vetî û ma ser guleyî varnayî. Babîyê mi pîya bi lajê mi şehîd bîyî.''