Hemserekê Meclîsê Rayberdişî yê Herêma Firatî Mihemed Şahînî îfade kerd ke dewleta tirke semedo ke krîz û kaosê xo biqedîna newe ra verê xo da waranê Rojawanî. Mihemed Şahînî babete ANFyî rê ercnaye.

Şahînî vist vîrî ke dewleta tirke wextê peyênî de hêrişê Kobanê kerd û nê hêrişan de di sivîlî û 3 şerwanê QSDyî şehîd bîyî. Şahînî vat: ''Îşxalê Serêkanîyê û Girê Sipî ra dima bi garantorîya Amerîka û Rûsya tay peymanî ameyî amadekerdene. Goreyê nê peymanan Tirkîya ganî hînî vera Rojawanî operasyonêk nêbikera. Dewleta tirke îdîa kena ke QSD û Îdareyo Xoser sînoranê ci rê gef o. La QSDyî qasê 30 kîlometreyan xo apey ant. La rixmê peymanan zî nê hêrişî nêvindertî. Rejîmê AKPyî hem zere hem zî teber de mîyanê krîz û kaosî de yo. Coka wazeno bi tedayêka newîye warê sîyasî de netîce bigêro.

Kobanê warê mîyanneteweyî de merkezêk o. Manaya ci ya sembolîke esta.Şorişê 19ê Temmuze, Îdareyê Xoserî Kobanê de dest pêkerd, DAÎŞ Kobanê de ame çinkerdene. AKP zaneno ke merkezê serkewtişî zî binkewtişî zî Kobanê yo coka hêrişê ci keno.

Hêrişê hewayî yê vera Kobanê astêka newîye ya şerî ya. Şerî dest pêkerdo. Vera Rojawanî şerêk yeno kerdene. Konjokturo sîyasî rayîr nêdano îşxalêkê hîrayî la tay hêzê Sûrîye verdenê. Tedaya vera Îdareyê Xoserî û QSDyî ra têna Tirkîya nê pêro hêzî fayde gênê. Ê wazenê prosesê verê ma de çareserîya Sûrîye ra tawîzan bigêrê coka hêrişanê Tirkîya çin hesibnenê. Dewleta tirke metodanê şerê taybetî şuxilnena. Ney zî bi rayîrê sîyasî, leşkrî, medya û medyaya dîjîtale kena. Bi nê hawayî wazena Sîstemê Îdareyê Xoserî qels bikera û îradeyê şarî bişikna. Ambargo nayo herême ser, awa Firatî birnaya, hêrişanê suîkastî kena. Hetê bînî ra dewleta tirke xîret kena ke zemînê hêrişêkê neweyî yê îşxalî amade bikera ke hema tay warê mîyanneteweyî ra paştî nêgirewte.''