Endamê Dayîreyê Têkilîyanê Teberî yê Îdareyê Xoserî yê Rojawanê Kurdîstanî Xalid Îbrahîmî derheqê keyeyanê endamanê DAÎŞî yê Kampa Holî de ANFyî rê qisey kerd.

Îbrahîmî vist vîrî ke Îdareyê Xoserî têkoşînê vera DAÎŞî de pêro mesuldarîyê xo ardê ca û vat: ''2019 de hetê cografîkî ra DAÎŞ herême de ame binvistene. La hetê rêxistinî û îdeolojîya xo ra DAÎŞ hema gandar o. Coka operasyonê ma yê vera hucreyanê DAÎŞî dewam kenê.''

Îbrahîmî da zanayene ke Kampanê Hol û Roje de bi hezaran cerg û keyeyanê DAÎŞî est ê û vat: ''Kampa Holî sey bombayêke destê ma de yo. Îdareyo Xoser bi îmkananê xo keno ke kampe de serwer bibo la zehmetîyanê pîlan anceno. Na mesuldarîye ganî teyna milê Îdareyê Xoserî de nêbîyêne. Ganî komelo mîyanneteweyî zî mesuldarîyanê xo bîyaro ca. Ganî DAÎŞ set meseleyêka terorî ya mîyanneteweyîye bêro ercnayene.''

Îbrahîmî ard ziwan ke Kampa Hol û Roje de cergê DAÎŞî yê hemwelatîyê 50 dewletan est ê û vat: ''Ma kenê ke tesbît bikerê ke nê kesî hemwelatîyê kamyew dewlete yê. Zehmetîyê ma zaf ê. Senî ke seba şerê vera DAÎŞî de Koalîsyono Mîyanneteweyî amebi awankerdene ganî nika zî seba agêrayîşê keyeyanê DAÎŞî koalîsyonêko winayên kom bibo. Teyna bi nê hawayî meseleya DAÎŞî çareser bena. Ma cara şerê vera DAÎŞî de 12 hezar şehîdî dayî. Îdareyo Xoser wazeno ke cergê DAÎŞî mehkemeyanê mîyanneteweyîyan de bêrê muhakemekerdene. Ancî keyeyê şehîdan qayîl nîyê ke endam û keyeyê DAÎŞî kampanê ma de bimanê. Çunke ê zî dejenê. Coka Îdareyo Xoser gêreno ke na mesele komelê mîyanneteweyîyî reyde çareser bikero.''