Goreyê BFM TV’yî 130 çeteyê ke kampa binê kontrolê Kurdan de tepişte yê do Fransa de bêrê muhakemekerdene.

Ama eşkerakerdene ke endamê çeteyan do bi teyareyan berê. Heme zî senî ke bêrê berdene bi Fransa do bêrê muhakemekerdene.

Wezîrê Karanê zereyî Chrîstophe Castanerî roja Sêşemeyî derheqê babete de qisey kerd û vat, “Hemeyê înan ê ke do bêrê ardene bi Fransa do dadgerîye rê bêrê teslîmkerdene. Eke dadagerî qerarê tepiştişê înan bido do bêrê tepiştene.”

Castanerî vat, “Tayê verî zî ameybî û ameyî tepiştene, ma înan nas kenê. Êyê ke yenê zî do bêrê tepiştene.”  

DESTÊ YPG’YÎ DE BI SEYAN DAÎŞ‘ÎYÊ XERÎBÎ ESTÊ

Yewîyê ke pabesteyê YPG’yî yê heta nika operasyonanê hemverê DAÎŞ’î yê Vakûrê Sûrîye de nizdîyê 3 hezar DAÎŞ’îyî tepiştî û nika zîndananê Rojava de yenê girewtene. Çende ke operasyonî dewam kenê na hûmare bena vêşî. Mîyanê tepişteyan de înan ra 800 kes zafaneyê înan Rojawan, 46 welatan ra yê. Îdareyê Rojava no wextêk o ke veng dano DYA, Fransa û Almanya ke DAÎŞ’îyanê xerîban bigîrê. Heta nika Endonezya, Rûsya, Fas û Sûdanî bi fermî îdareyê Rojava ra welatijê xo yê ke YPG’yî ê bi weşî giretê, waştê.