Dewleta Tirkî û çeteyê ke girêdayîye aye yê 20‘ê Çele 2018 de hêrişê Efrînî kerd û îşxal kerd. Badê hêrişan şarê herême bar kerd û derbazê herêma Şehba bîyî û  bi şert û mercanê zehmetinan ciwîyenê. Nê şer û hêrişan ver tesîro tewr pîl domanan de ame viraştene. Sazîyanê sey Komîteya Perwerdeyî ya Şarî ya Demokratîke, Sazîya kar û Barî ya Şarî û Heyva Sor a Kurdistanî ra yew komîte ameye awankerdene û na komîte bi perwerdeyê doman-maye kena  ke paştdarîya psîkolojîke bido domanan. Endamê Komîteye keye bi keye, qamp bi qamp gêrenê û domanan ser xebitîyenê.

Endamanê Komîte ra Egîd Xelîlî derheqê xebatanê xo de ANF‘ rê qisey kerd. Xelîlî bale ante rewşa psîkolojîyê domanan ser û wina va: “ Domanan şer de merdişê xeylî kesan dîyo û nê ver problemê psîkolojîkî peyda bîyî. Ma zî seba ke paştdarîya psîkolojîke bidîme ci yew komîte awan kerde û bi no qeyde kenîme ke domanî hetê psîklojîkî ra agêrê rewşa xo ya normale ser. Komîta bi semîner, tîyatro û xebatanê bînan domanan reyde xebatan kena. Verî zaf beşdarê xebatan nebîyêne la tayê wext ra dima, ma netîceyêko muhîm girewt û domanan xo da rê ma.“

PROBLEMÊ DAYÎKAN DOMANAN DE TESÎR KENÊ

Temsîlkarê Heyva Sor a KurdIstanî Rêber zî vano domanî bi aktîvîteyan benê keyfweş. Qaso ke Rêber vano, roşanê qûrbane de aktîvîteyê sey musabaqa, tîyatro, palyaço û mûzîkî ameyî viraştene û xeylî domanî bêşdarê  nê aktîvîteyan bîyî. Komîte bi kampan nêmenda û dewan de zî nê aktîvîteyî viraştê.

Hevîn Şemîyo zî na komîte de ca gêna û seba ke domanan de têkilîya raste bêro karardene perwerde dana dayîkan. Hevîn Şemîyo wina va: “ Nê perwerdeyî ra ver domanî tesîrê problemanê maya xo de mendêne. La perwerdeyî ra dima dayîkî tayê çiyan musayî û nika hîna baş têgêrenê.“  Endamanê komîte veng da dewletanê mîyanneteweyîye ke wa paşt bidê domanan ê ke şerî ra remayî û şertanê zehmetan de ciwîyenê.