Her tim rastî bidej ê, la ê dejî nêresenê dej û nalîna domananê Efrînî yê ke rîyê îşxal û qirkerdişî ra bêçare mendê ke koç kerdê û zereyê xeymeyanê kampanê Şehba de ke ne serdî ra û ne zî germî ra pawenê, ciwîyenê.

Zereyê kampanê Şehba de ke bi hezaran welatijanê Efrînî û şarê dormeyê ci rîyê îşxalê dewleta Tirkî ra û çeteyanê înan ra xo sepernayê nê kampan, cuye xeylî zehmet a û felc bîya. Gama ke ma zereyê nê kampan de gêrayêne, ma hende dîmenan rê bî şahid ke qalkerdiş û pênasekerdişê cuya tîyayî nêna ziwan.  

AMEYOXÊ DOMANAN VÎNDÎ Û VILA BÎYO

Qaso ke çimê merdiman vîneno xeymeyî pey ser ameyê ronayene û seke perçeyêk na dinya ra nêbê asenê. Zereyê nê xeymeyan de domanê Efrînijî yê ke destê qirkerdiş, tank û topan ra xelisîyayê û bêçareyîye ra koçber bîyê ciwîyenê.

Dimayê hêrişanê 20’ê Çile ya 2017’î ya artêşa Tirkî û çeteyanê aye ya serê Efrînî kayî, kêfweşî, umîd, coş û wendişê domananê Efrînî nîmcet mendo.

KAMPA BERXWEDANÎ DE PERWERDEYÊ DOMANAN

Îdareyê mekteba Kampa Berxwedanî ra mamoste Dijwar Îbrahîmî derheqê halê mektebe de qisey kerd û vat: “Zereyê Kampa Berxwedanî de perwerde yeno dayene. Hûmara wendekaranê ewilênan 500 û hûmara wendekaranê mîyanênan û hadreyîye zî goreyê şertanê koçberîye ra xeylî vêşî yê. Kîşta mûsayîşê ziwanê Kurdkî de ziwanê Erebkî û Îngilîzkî zî yenê dayene.”  

 ‘WAŞTIŞ Û UMÎDÊ ÎNAN AGÊRAYÎŞÊ BI EFRÎNÎ YO’

Îbrahîmî ard ziwan ke goreyê şertanê giranan ê koçberîye serkewtiş zî esto. Mamoste Îbrahîmî bale ante serê waştişanê wendekaran û wina dewam kerd: “Waştiş û umîdê wendekaran agêrayîşê bi Efrînî yo. Wazenê seba agêrayîşî qîrayîşê înan bêro şinawitene û wendişê xo rê wareyê xo de dewam bikerê.”

Zereyê Kampa Berxwedanî de 1750 kesî ciwîyenê, nînan ra 800 kesî doman ê ke emrê înan mabênê 1-15 serrî de yo. Şertê cuya xeymeyan xeylî zehmet ê, zimistanî tim şilî ya û amnanî zî nisbetê germî xeylî vêşî yo. Naye ra no hal nêweşîyanê cîya cîyayan xo reyde ano.

Nê heme halê cuye yê teberê waştişê merdimîye de tewr zaf zî tesîrê domanan kenê. No zî beno sebeb ke hetê psîkolojîye ra tesîrêko xeylî xirab domanan ser o virazîyo. Rixmê nê de zî îrade û nerazîbîyayîşê domanan ê hemverê îşxalî tim bihêz ê û biqerar ê.

Do bi peşmirîyayîşê domananê Efrînî bend û zincîrê îşxalî û şerî bêrê şikitene.