Pisporê Rojhelatê Mîyanênî Dr. Taha Alî Ahmedo ke misirij o, bi wesîleya serrgêra Komployê Mîyanneteweyîyî ANFyî rê qisey kerd.

Dr. Taha Alî Ahmedî da zanayene ke Rayberê Şarê Kurdî Abdullah Ocalan kesêko entelektuel o û rexneyê ey çarçewaya klasîke ra cîyayê. Ahmedî vat: ''Abdullah Ocalanî pawitişnameyanê xo de qala ci kerde ke ganî komel cînsîperestîye û cîyakerîye ra xo bixelisno û seba ney zî neteweya demokratîke pêşkêş keno. Abdullah Ocalan seba averşîyayîşê komelî paştdayîş û yewîya şaran pêşkêş keno. Reyna o seba serkêşîya komelî cinîyan pêşkêş keno ke bi nê hawayî do komel sîstemê serdestîya camêrdan ra do bixeliso.''

Dr. Taha Alî Ahmedî da zanayene ke paradîgmaya Neteweya Demokratîke ya Abdullah Ocalanî wayûbiratîya şaranê ereb û kurdan xurtêr kena û vat: ''Birêz Ocalan vano ke Rojhelatê Mîyanênî de îdareyî ganî goreyê nîjadan nêbîyê. Nê hetî ra Neteweya Demokratîke modelêko raşt o. No modelo ke Abdullah Ocalanî afernayo, komelî keno merkezê xo, mîyanê şaran de wayûbiratîye, paştdayîş, têdûştîye û cuya hempare awan keno.''

Dr. Ahmedî îfade kerd ke modernîteya kapîtalîste fikranê ey ra semed Abdullah Ocalan kerdo hedef û vera ci Komployo Mîyanneteweyî kerdo. Dr. Ahmedî vat: ''Seba ke bi fikranê Abdullah Ocalanî şorişêk nêro kerdene Amerîka, dewletanê Ewropa û Îsraîlî komplo de cagirewt. Bi nê hawayî vera şaran komplo ame kerdene. Şorişê Rojawanî yo ke bi fikranê Ocalanî amebi kerdene do îlham bido pêro şaranê dinya. Rojawan seba şaranê Rojhelatê Mîyanênî nimûneyêko raşt û weş o. Sîstemê Rojawanî bi taybetî sîstemê ci yê hemserekîye girîng ê. Heyf ke Şorişê Rojawanî hetê nîjadperestanê Şam, Bexdad, Tehran û Anqara ra gêrîyayo binê ablûqa. Rixmê ney zî şarê Rojawanî xo rê xoverdayîş û cuya newîye kenê esas.''