Endamê Fermandarîya Herêma Firatî ya QSDyî Dr. Huseyîn Koçerî îfade kerd ke vera hêrişê îşxalî yê muxtemelî yê dewleta tirke hetê rêxistinîya komelkî, stratejîya şerî û amadekarîye ra ê astêka cîyey de yê.

Endamê Fermandarîya Herêma Firatî ya QSDyî Dr. Huseyîn Koçerî ANFyî rê qisey kerd.

Koçerî şehadetê Ferhad Şiblî û hîrê embazanê ci vist vîrî û vat: ''Dewleta tirke bi paştdayîşê hêzanê mîyanneteweyîyan her ca de vera kurdan şerê qirkerdişî kena. Dewleta tirke zanena le heta ke şorişgêrê Kurdîstanî est vê kurdî do seba azadî û demokrasî bixebitê, coka tecrîdê vera Abdullah Ocalanî kena giranêr, hêrişanê vera Herêmanê Pawitişî yê Medya rê dewam kena, xîret kena ke Başûrî îşxal bikera û dest bierza erdê Iraqî. Babeta şehadetê Ferhad Şiblîyî de zî mesuldaro verên hukmatê Iraq û Kurdîstano Federe yo.''

Koçerî gefê Erdoganî yê vera Rojawanî ercnayî û vat: ''Erdogan key Tirkîya de teng beno ma rê gefan waneno. Tirkîya nika mîyanê rewşa tewr xirabe de ya û vêşena. Komelê Tirkîya îqtîdar û cerganê Erdoganî ra îlelah keno. Ma prosesanê Efrîn, Serêkanîyê û Girê Sipî de tecrubeyî girewtî, hetê leşkerî û taktîkî ra xo xorin kerd, hêzê xo yê leşkerî goreyê şertanê hêriş û şerî amade kerdî. Ma seba şerêkê emrdergî amadekarîyê xo kerdî. Ma sey şerwanna do ca û wareyê xo ra hînî fek vera medê, asta tewr berze de xo ver bidê. Senî ka DAÎŞê Erdoganî ame qedînayene, leşkeranê Erdoganî ra zî hesab do bêro persayene.

Heta ke Sûrîye de kaos dewam bikero Erdogan xîretê îşxalî rê do dewam bikero. La şarê ma hînî rêxistinkerde yo, sey verî nîyo. QSD ho pêro Sûrîye paweno. Serkêşîya kurdan de pêro komelê Sûrîye xo ver danê. Rejîmê Şamî pawitişê Rojawanî de paştî nêdano ma. La ma amade yê ke hêzanê rejîmê Şamî reyde şaranê Sûrîye bipawê. Ganî rejîmê Şamî Îdareyê Xoserî û QSDyî rê hûrmet bikero. Babeta pawitişê hemparî de eke mabênê Fermandarîya QSDyî û fermandarîya hêzanê Îdareyê Şamî de peymanêke bivirazîya do baş beno. Kamyew hêzê Sûrîye erdê Sûrîye bipawo, QSD û Îdareyê Xoserî rê hûrmet bikero berê ma înan rê akerde yo.''

Koçerî bale ante ser ke Minbic, Reqa, Tebqa û herêmanê bînan ê ereban ê Sûrîye de paştî yena dayene QSDyî û vat: ''Hêzê ma şaranê herême ra yeno. Naye ra ber, hêzêko bîn çin o ke ma tira paştî bigêrê. Ma paştdayîşê şaranê xo ra moral û hêzî gênê. Ma do seba pawitişê Sûrîye çi hewce bibo bikerê.''