Endamê Komîteya Rayberdişî ya PKKyî Duran Kalkanî programêkê taybetî yê Medya Haber TVyî de rojdem ercna. Erjnayîşanê Duran Kalkanî qismêk wina yo:

''Tay hetan vat mabênê sibate de do eşkerayîya Îmraliyî bêro. Senî ke 15ê sibate eşkerayîye bêro dayene , her hetî ra vila bi. La 15ê sibate ravîyart, eşkerayîyêke nêîbye. Ma nêzanê qey wina bi. Ma zî kenê ke fam bikerê. La ma nê zanê û wazenê vajê. Na rewşe qetî rîyê ma ra nêbîye. Ereykewtişê eşkerayîye rîyê têgêrayîşê ma ra nîyo. Ma do prosesê verê xo de bivînê, qey wina bi. La ganî wina nêbîyêne.

Rayber Apoyî mektub nuşt. Embazan vat. Ma reyna dî ke Rayber Apo semedê çareserkerdişê meseleya kurdan û demokratîkbîyayîşê Tirkîya zaf zelal û qerardar o. Xora ma zî qerardar ê. Têgêrayîşê ma xeylê reyî eşkerayîye daye û tewirê xo yê semedê prosesî ramojna. Xora ma tim vat; Ma heta nika tim kenê ke qeraranê Rayber Apoyî bîyarê ca. Ewro ra tepîya zî ma do wina bikerê.

 Tay kesî nata wata qisey kenê. Wa çew goş medo nê qiseykerdişanê vengan ser. Tay hetî vera ci yê, tay hetî kenê ke verê ci bigîrî. La se kenê wa bikerî, ê biteqê zî kurdî do bibê azad û Tirkîya bibo demokratîk. Êyê ke kenê ke verê çareserkerdişê meseleya kurdan û azadîya kurdan bigîrê û kurdan û tirkan biverdê pê ganî bin bikewê. Nika xebetêka muhîm ya heyetî est a. Ewro Hewlêr de serekîya PDKyî de pêvînayîş kerd. Ma vatbi ma xebetanê heyetî muhîm vînenî.

Cepheyê îqtîdar û muxalefî ra çîyêko newe çîn o. Ganî ma hîşar bê. Vanê wa eşkerayîye bêro dayene. Merdim vano qey îmkanê Rayber Apoyî est ê la ey eşkerayîye nêdaya. Ganî sîstemê îşkence, tecrîd û qirkerdişî yê Îmraliyî de senî bêro qiseykerdene. Ganî verî no sîstem bêro wedaritene. Bibo azad ke bieşko çîyêk bikero. AKP her çî goreyê menfeatê xo keno. AKP eslê xo de peyê çareserkerdişê meseleyêke de nîyo; peyê teslîmgirewtiş, îmhakerdiş û çînkerdişî de yo. Şerê psîkolojîkî gird keno.  Wazeno ke tesîrê Rayber Apoyî yê serê şarê kurdî şaranê Rojhelatê Mîyanênî biqdîno. Êyê ke vanê qey kurdan xapînenê, xeletîyenê.

Herêmanê Pawitişî yê Medya, Rojawanî, qirkredişê vera rojnamegeran, destbendkerdiş û tepiştişê Vakurî ramojnenê ke AKP nêwezano pêkewtişî biqedîyê. Ma dîqet bikerê; ziwanê ci hêrişkar o, fîkrê ci hêrişkar o, çalakîya ci hêrişkar a. Tepişneno, kişeno, şikneno. Zextêk keno. Wina nêbeno! Wina qeyde prosesêk nêeşkeno aver şiro. Nê tewirî, polîtîkayî verê demokratîkbîyayîşî de asteng ê. Ganî no bêro vînayene. Semedê demokratîkbîyayîşî ganî nê bêrê caverdayene. Ganî no zaf hol bêro vînayene û famkerdene.''