Heyetê Îmraliyî yê DEM Partî bado ke Başûrê Kurdîstanî de Hewlêr û Silêmanî de pêvînayîşî kerdî serê mezelê  rayberê tarîxî û Serekkomaro verên ê Iraqî Celal Talabanî  de eşkerayîye daye. Hemserekê Pêroyî yê DBPyî Keskîn Bayindirî ke eşekrayîye de qisey kerd, nê vatî:

''Ma mesajê Birêz Ocalanî yê derheqê prosesî de Birêz Bafil û Kubat Talabanî reyde pare kerdî. Ma pêvînayîş de qala ameyoxê şarê kurdî, rewşa Rojawanî, prosesê haştîye yê Kurdîstan û Tirkîya kerd.  Rolo ke Mam Celalî verî semedê haştîye û çereserî kay kerdêne ewro Birêz Bafil û Kubat Talabanî zî kay kenê. Seba ke înan tewiro winayên ramojna û wirdan rê zî spas kenê. Şarê Kurdîstanî wa zerrîya xo rehet tepiş o. Ewro reyna vejîya meydan ke heme aktorê kurdan bi tewirê wayubiratîye, yewîye û  neteweyî û heme hêzê xo paştî danê nê prosesî. Semedê na netîce ma zaf bîyî şa û zaf hêvîdar ê.

Rojdemê şarê kurdî de xeyê krîzî yê Rojawan, Başûr û Rojhelatê Kurdîstanî est ê. La ma semedê serkewtiş û destkewteyanê kurdan hêvîdar ê. Hîrê rojî yo ma tîya bingeyê yewîye de hêzan û aktoranê kurdan reyde pêvînayîşanê muhîman kenê. Heme aktorî hêzê sîyasîyî çîyêkê hemparî vanê, eke serkêşîya Birêz Ocalanî de proses bêro averberdene, destkewteyê kurdan do gird bê. Haştîye çareserî do serkêşîya Abdullah Ocalanî de bêrê înşakerdene. Înîsîyatîfo ke Birêz Ocalanî girewto û hêzê ci yê çareserîye ra paştîya ma pêt a û ma do bi heme hêzê xo paştî bidê ci. Şarê kurdî semedê prosesî bîyo yew. Heme aktorê kurdan û hêzê sîyasîyî semedê haştîye û pawitişê destkewteyanê xo û dahîna girdkerdişê ci tewirê yewîya neteweyî ramojnenê. No tewir semedê şaranê Kurdîstanî hêvîya gird a.

Ma sey heyetê waştêne ke tîya heme hêzan û rêxistinanê kurdan reyde pêvînayîş bikerê. La rîyê îmkanan ra ma nêeşkayî heme hetan de pêvînayîş bikerê. Kesê ke ma nêeşkayî zîyaret bikerê, ma înan ra ozrê xo wazenê. Birêz Ocalan hetê ke ma zîyaret nêkerdî înan zî zaf muhîm vîneno û paştîdayîşê înan zî zaf erjîyaye hesibneno. Ey nê pêro hetan rê selamê xo şawitî û vat paştdayîşê înan ê semedê çareserî û haştîye muhîm o. Ma hêvî kenê û pawenê ke heme aktorî paştî bidê prosesê ke do serkêşîya Birêz Ocalanî de bêro averberdene.

Ma reyna YNKyî rê spas kenê.  Bitaybeytî ma Serekê YNKyî Bafil Talabanî û Hetkarê Serekê Herêma Federe ya Kurdîstanî Kubat Talabanî rê zaf spas kenê. Reyna ma tîya Birêz Şanaze Îbrahîm reyde zî pêvînayîş kerd ke tewirê ci zaf erjîyaye yo. Bi nameyê heyetê ma ez aye rê spas kena. Şenaze vat ganî heme cinîyê kurdan û  hemê cinîyê ke dinya de haştîye û azadîye wazenê paştî bidê Birêz Ocalanî.

Xebatê ma yê Silêmanî qedîyayî. Ma do şirê Hewlêr û ûca ra siba agêrê. Ma do rojanê verê ma da derheqê nê pêvînayîşan de eşkerayîya nuştekîye bidê.''