Serfermandarê Hêzanê Sûrîyeya Demokratîke (QSD) Mazlûm Ebdîyî eşkera kerd ke eke Îdareyo Xoser nêro goştarîkerdene projeyê çareserîye do ser nêkewê.

Serfermandar Mazlûm Ebdîyî kanala El Erebîye reyde qisey kerd û bale ante ser ke krîzê Sûrîye bi metodê leşkerî nêno çareserkerdene û vat ke Îdareyê Xoserî seba ke erdê Sûrîye bipawo zaf bedelî dayî.

Ebdîyî da zanayene ke agêrayîşê verê dewirê serra 2011î mumkîn nîyo û vat: ''Metodê leşkerî tewr çare nêbeno. Seba ke dejê şarê Sûrîye biqedê ganî rayîrêko demokratîk bêro weçînayene.''

Mazlûm Ebdîyî seba çareserîyan qala girîngîya dîyalogan kerde û îfade kerd ke Îdareyo Xoser warê şerî de ser kewt û ganî her kes nê esasî ser o nêzdîyê Îdareyê Xoserî bibo. Mazlûm Ebdîyî vat: ''Kombîyayîş û xîretê çareserî yê ke tede Îdareyo Xoser çinbi bin kewtî.''

Mazlûm Ebdîyî derheqê komîteya qanûnê bingeyî ya newîye de tay ercnayîşî kerdî û eşkera kerd ke 'xelatîye ameye kerdene'. Ebdîyî da eşnawitene ke qerarnameyê Konseya Asayîşî ya Neteweyanê Yewbîyayeyan de yew nakokîye esta. MazlûmEbdîyî vat: ''Ganî pêro terefî a komîte de ca bigêrê. Naye ra ma vanê ke çareserîya bi Sûrîye, qanûno bingeyîn ê bi Sûrîye û dîyalogê seba Sûrîye.''

Îdareyê Xoserî û Şam pêvînayîş kerd

Îdareyê Xoserî û îdareyê Şamî bi mabênçîya Rûsya tay pêvînayîşî kerdbi û Îdareyê Xoserî zî derheqê nê pêvînayîşan de bi hawayêkê pozîtîfî qisey kerdêne.

Temsîlkaranê Îdareyê Xoserî dabi zanayene ke Rûsya eşkera kerd ke rejîmê Şamî seba dîyalogan amade yo. La Hetkarê Wezîrê Karanê Teberî yê Sûrîye Faysal El Mîqdadî nê vatişê temsîlkaran red kerdbi.

Buroyê Karanê Teberî yê Îdareyê Xoserî zî eşkerayîyêke daye û vera îfadeyanê Mîqdadî nêrazîbîyayîşê xo mojna û ard ziwan ke no nêzdîbîyayîşê Sûrîye bibi semedê şerê zereyî yê Sûrîye ke serra 2011î de dest pêkerd û hema zî dewam keno.