Fermandaro pêroyî yê QSD’yî Mazlûm Ebdîyî rojnameyê Yenî Ozgur Polîtîka rê qisey kerd û vat, “Eke artêşa Tirkî hêrişê cayêk bikero do na yewe agêro bi şerêkê pîlî. Ma her kesî ra vato. Tirkîya zî zana, Amerîka zî û Fransa zî.”

 Ebdîyî bale ante sere Şorişê 19’ê Temmuze û vat, „Tîya ra tepîya seba pawtişê nê rayîrî, seba temambîyayîşê prosesê awanbîyayîş û çareserîyêka demokratîke ya seypê ya şaran a zereyê yewparîya Sûrîye ma do xebate bikerê.”

 Sînor de Hal Senî yo?

Ebdîyî derheqê hale sînorî de zî hayîye daye û vat, “Tirkîya hêzêko cidî serê sînorî de bica kerdo. Ez eşkena vajî ke ma zî hêzê xo sînorî ser o bica kerdo. Alozîyêk esta. No hal provokasyonan rê zemîn amade keno. Şaşîyêk, çeqikêk bena ke agêro adirêk.”

 Seba persa “Şima hêrişêk pawenê?” Ebdîyî vat, “Rojakewtena Firatî û Efrîn nêmanenê yewbînan. Nê di herêmê cîya yê. Mumkun nêyo ke halo ke Efrîn de virazîya tîya tekrar bibo. Ma do rayîr nêdê na yewe.”

 ‘Eke Hêrişê Ma Bikerê…’

Ebdîyî derheqê qesdê ci yê vatişê ‚şerê pîlî‘ de vat, „Mesela eke Tirkîya hêrişê Girê Sipîyî bikero do Dêrike ra heta Minbicî meterîsêkê şerî vejîyo werte. No qerarê ma yo. Ma her kesî ra vato. Tirkîya zî bi nê zana, Amerîka û Fransa zî. Eke hêrişê ma bikerê do sînoro 600 kîlometre agêro wareyê şerî; do Sûrîye de şerêko dîyin o xomîyanên vejîyo. Stratejîya Tirkîya a ya ke Girê Sipî û Kobanê zî bigêro û vindero. Labelê eke hêrişêk bêro kerdene heta ke Tirkîya xo bianco do şer dewam bikero.“

 Tewirê DYA

Ebdîyî derheqê tewirê DYA de vat, „Amerîka dir hemverê DAÎŞ’î de tîfaqêko ma yo hempar esto. Şerê nikayî yê hemverê DAÎŞ’î Dêra Zor û Reqa de yo. Tirkîya hêrişê ma bikero do hêzê YPG’yî xo zereyê QSD’yî ra bianco. Eke çîyêko winayên bibo do şerê hemverê DAÎŞ’î vindero. DAÎŞ do newe ra bibo xurt. Eke ma tera vejîyê do rejîm seba girewtişê herême bikewo ê herêman. Xebata ma ya hempare ya Amerîka û koalîsyonî dir do zirar bivîno, do derbe biwero. DYA nê nêwazena. Zereyê koalîsyonî de qasê 73 welatî estê. Înan tu yew nêwazeno ke zirar bireso na hemkarîye. No meseleyêko mîyanneteweyî yo. Naye ra zextêko cidî Tirkîya ser o yeno kerdene. Efrîn de no çinbi.”

 Herêma Tampone

Ebdîyî bale ante serê munaqeşeyanê derheqê herêma tampone û vat, “Erdoganî serra 2018 de vat, ‘ma amadekarîyê xo qedînayê, ma do rojakewtena Firatî de dest bi operasyonêk bikerê.’ Bîyo hewt serrî yo ke hetê ma ra hemverê Tîrkîya de hêrişêk nêameyo kerdene. Seba înan estbîyayîşê ma proble o. biewnîrê 6-7 serrî yo ma şer de yê. Ma şerêkê neweyî nêwazenê, ma şerêkê pîlî nêwazenê. Qiseykerdişê mabênê Erdogan û Trumpî de projeyê ‘herêma biasayîşe’ vejîya werte. Ma zî bi nammeyê QSD’yî projeyê xo amade kerd û pêşkêşê DYA kerd. Projeyê ma xeylî maqûl bi.”

‘Wa Hêzê Cayîyî Rayra Berê’

Ebdîyî no ard ziwan, “Ma wazenê hêzê cayîyî herême de estbê. Qesdê ma hêzanê cayîyan ra no yo ke hêzê Kobanê, Serêkanî, Qamişlo, Girê Sipî yê. Heman wextî de ma eşkenê çekanê giranan ê ke eşkenê xo biresnê Tirkîya yê sey tank, topan zî herêma 5 kîlometreyan ra peyser biancê. Menzîlê tayê çekanê ma qasê 20 kîlometreyî yo. Ma eşkenê nînan zî çarçewaya menzîlê înan ra biancê. Eke no gef o ma nê yewî gefbîyayîşî ra vejenê. Tirkîya vana, ‘Wa êyê ke teber ra ameyê rayra berê.’ Ma zî vane ke wa şaro cayî rayra bero. Do bi nê hawayî problem hal bibo.”

 ‘Ganî Hêzê Bêhetî Dewrîye Bigêrê’

Ebdîyî vat ke ganî Tirkîya soz bido ke do hêriş nêkero û vat, “Ma wazenê hêzêko mîyanneteweyî wezîfeyê dewrîye bica bîyaro. Koalîsyon yan zî hêzêko bîn. Tirkîya hetêk a. Ma wazenê hêzêko bêhet na yewe bikero.”

‘Ganî Efrîn ra Vejîyê’

Ebdîyî vat, “Ma nika bi şert qebûl kerdo ke Tirkî zereyê dewrîyeyan de estê” û derheqê nê şertî de zî vat, “Bê îstîsna ganî heme Efrînijî agêrê erdê xo ser. Ganî çeteyî Efrîn ra vejîyê. Mal û mulkê Efrînijan ê ke ameyê destsernayene ganî teslîmê Efrînijan bêrê kerdene. Êyê ke teber ra ameyê ardene û Efrîn de ameyê bicakerdene ganî bêrê vetene. Nê heme zî ganî bi asayîşê hêzanê mîyanneteweyîyan bêrê kerdene û binê kontrolê Meclîsê Efrînî de bibo. Gama ke no bica ame a game leşkerê Tirkan eşkenê sey nîyetêko rind tewrê dewrîyeyan bibê.”