Endamanê Rêxistina Heqanê Merdiman a Efrîn-Sûrîye derheqê sûcanê ke bi hewayêkê sîstematîkî, Efrîn de vera cinîyan yenê kerdene de eşkerayîye daye. Eşkerayîye Kampa Serdemî ya ke koçberê efrinîijî tede yê, ûca de ameye kerdene. Endamê rêxistine û temsîlkarê dezgehanê komelê sîvîlî tewrê eşkerayîye bîyî.

Eşkerayîye de nê ameyî vatene: ''Bado ke dewleta tirke û çeteyanê ci Efrîn îşxal kerd a roje ra nata verê cinîyan ê Efrînî sûcê sey remnayîş, îşkence û her qeyde sûcî yenê kerdene. Dewleta tirke û çeteyê ci seba ke cinîyan çîn hesibnenê vera înan sûcanê girdan kenê. Her çiqas qala demokrasîyî bikerê zî herême de têna sûcê ke vera cinîyan yenê kerdne est ê. Rixmê xeylê pêkerdişanê mîyanneteweyîyî her roje domanî raştê îşkenceyî yenê û cinîyan rê her hetî ra sûcê teberê merdimîye yenê kerdene.

Roja ke dewleta tirke Efrîn îşxal kerd a roje ran ata sucê ke ameyî belgekerdene wina yê: Hezarî ra zafêr cinîyî ameyî remnayene û aqibetê zafin nîno zanayene. 99 cinîyî ameyî qetilkerdene. Nînan ra 9 cinîyan şertanê ke nînê zanayene de xo kişt. 74 cinîyî raştê tecawuz  û şîdetê cinsî ameyî. Pîya bi nînan binê zor û zextî de domanî yenê zewinayene.

Ma sey aktîvîstanê heqanê merdiman veng danê heme rêxistinanê huquq, însanî û cinîyan ê mîyanneteweyîyî ke wa vera sûcanê ke vera şarê Rojawanî yenê kerdene wezîfeyê xo yê ehleqî bîyarî ca. Bitaybetî wa qetilkar û hêrişkarê cinî û domanan bêrê cezakerdene. Gerek dewleta tirke cayanê ke îşxal kerdî ra peyser agêro û koçberî agêrê herra.''