Merkezê Belgekerdişê Sûcan derheqê sûcanê şerî yê dewleta tirke ya îşxalkere û cerganê ci de raporêk amade kerd.  Merkezî da zanayene ke şaristanê kurdan Efrînê îşxalkerdeyî de dewleta tirke hewteyê verênî yê Adare de tewr tay 16 kesî remnayê.

Agahîyê raporî wina yê:

''1ê adare de cerganê El Ceyş El Watanî (Polîsanê Sivîlan) dewa Bîbaka ya qezaya Bilbilî de Ziyad Şeref (49), Ebdurehman Şeref (62) û Salan Dilo (58) remnayî. Cerganê heman kome dewa Hec Hesnayî ya Cindirêsî de zî Kamîran Dîbo Seydo (44) remna.

2yê adare de cerganê El Ceyş El Watanî dewa Emara ya Mabaya de heman keyeyî ra Rozalîne Kemal Murad, Ebduhenan Mihemed (70) û lajê înan Şêrzad Fethî remnayî. Cergan qezaya Cindirêsî de zî Omer Reşo (43), Nîhad Hesen (37) û Ziyad Reşîd Mihemed (48) remnayî.

3yê adare de cerganê El Ceyş El Watanî (Polîsanê Sivîlan) qezaya Mabeta de Ferhand Henîf Mihemed, Gîvara Îbrahîm Mihemed, Mihemed Elî Hemkê Hisên û Mihemed Ridwan Mistefa remnayî.

7ê adare de cerganê Ceyş El Watanî (Polîsanê Leşkerîyan) Cindirês de Ehmed Îbrahîm Henan (48) û Rêzan Şêx Mihemed (36) remnayî.''