Goreyê xebera ANHA  qezaya Cindirêsî ya Efrînî de ke binê îşxalê dewleta tirke de ya, sercergêkê DAÎŞî Mahir El Eqal kişîyayo.

Vervatoxê Fermandarîya Merkezî ya Pentagonî Dave Eastburnî AFPyî rê qisey kerd û da zanayene ke Mahir El Eqal wexto ke motorsîkletî ra siwar bîyêne nêzdîyê Cindirês de kişîyayo û pawitoxê ey zî bi giranî birîndar bîyo.

Merkezê Çimdarîya Heqanê Merdiman a Sûrîye (SOHR) dîyar kerd ke Mahir El Eqalî îşxalê Reqa de rolêko pîl kay kerd. 

Herêmê ke binê îşxalê dewleta tirke de yê cerganê DAÎŞî rê bîyê wargeh. Verî zî sercergê DAÎŞî yê sey Bexdadî, Qureyşî nê herêman de kişîyaybî.