Şahîda qijkeke ya hêriş û qirkerdişê dewleta tirke yê vera Serêkanîyê Nêwîne Xabûr ard ziwan ke embazê aye verê çimanê aye de ameyî qetilkerdene û vat: "Ez wazena abigêra şaristanê xo. Mi bêrîya embazanê xo reyde keykerdişî kerde.
Hêriş û îşxalê dewleta tirke û cerganê aye de ke 9ê teşrîna verêne de vera Vakur û Rojhelatê Sûrîye dest pêkerd doman û cinîyî zî tede zaf sivîlî ameyî qetilkerdene û birîndar bîyî. Hêrişan ra dima 300 hezar merdiman zî warê xo ra koç kerd.
Sivîlê ke hêrişanê dewleta tirke de neçare mendî ke koçê Serêkanîyê bikê şaristananê dormeyan de û kampa Waşokanî ya Îdareyê Xoserî de ameyî cadayene. Rîyê hêrişn ra bi hezaran domanî perwerde ra dûrî kewtî. Domanî xîret kenê ke travmaya barbarîye xo bixelisnê.
Nêwîne Xabûr nê domanan ra yew a ke îşxalî ra sebeb neçare mende ke keyeyê xo reyde Serêkanîyê ra koçê Hesekê bika. Xabûre şahîdê kiştişê sivîlan, domanan ê hetê teyarayanê şerî yê tirkî ra bîye. Nêwîna ke verê çimanê aye de dewe û keyeyê înan yenê bombavarnayene vana ke keyeyê înan hetê îşxalkeran ra ame vêşnayene û hacetê keyeyê înan ameyî diznayene.
Nêwîne Xabûr vat: "Nê cayan de zaf sivîlî û domanî ameyî kiştene. Embazê mi hetê dewleta tirke ra ameyî qetilkerdene. Her kes vera na rewşe bêveng o."
Nêwîne îfade kerd ke a wazena abigêra şaristan û dibistana xo û vat: "Mi bêrîya ci kerde ke ez embazanê xo reyde kay bika." Nêwîne pare kerd a tersena ke teyarayê şerî înan ser o bombayî bivarnê û vat: "Vera Erdoganê terorîstî ma bibê yew."
