Hetkarê Hemserekanê Meclîsê Rayberdişî yê Îdareyê Xoserî yê Rojawanî Hesen Koçerî bale ante hêrişanê DAÎŞî yê vera Başûrê Kurdîstanî ser û derheqê babete de ANFyî rê qisey kerd.

Koçerî verî bale ante hêrişanê dewleta tirke yê vera Şingalî ser û vat: ''Nê hêrişî netîceya îtîfaqê dewleta tirke, PDK û hukmatê Iraqî yê. PDK û Iraqî êzidîyî mîyanê qirkerdişî de verdayî. Rixmo ke Şingal de alaya Iraqî esta Tirkîya hêrişê ci kena. Dewleta tirke, Iraaq û PDK wazenê pê nê hêrişan îradeyê êzidîyan bişiknê. Mesuldarê Qirkerdişê 3ê tebaxa 2014î Iraq û PDK yê. Nika ê reyna şarê êzidîyan danê qirkerdene. Warê mîyanneteweyî zî vera hêrişan vengê xo bêvet.

Şingal sînorê Tirkîya de nîyo. Çi eleqeyê Tirkîya bi Şingalî esto? Eşkerayo qirkerdişo ke DAÎŞî nêmcet verda dewleta tirke wazena temam bikera. Dewleta tirk dişmena pêro kurdan a û wazena pêro kurdan qir bikera. Iraq ganî vera nê hêrişan qîyamet rabikerdêne. Kifş o ke Iraq nêeşkeno şarê êzidîyan bipawo. PDK xora bi temamî dewleyta tirke reyde têgêreno. O zî têna hêrişan seyr keno.''

Koçerî dima hêrişê DAÎŞî yê vera Kerkûkî vistî vîrî û vat: ''Ma verî zî têgêrayîşo newe yê DAÎŞî tesbît kerdbi. Nê hêrişanê vera Kerkûkî tesbîtê ma îsbat kerd. DAÎŞ hetê dewleta tirk ra yeno weyekerdene û rêxistinkerdene. Nê hêrişê DAÎŞî raşta raşe hetê MÎTî ra yenê plankerdene. Fermanê ci dewleta tirke dayo. Seba ke Başûr de vengîye esta û seba ke PDK mîyanê krîzêkê ekonomîkî de yo nê hêrişan rê zemîn virazîya. 

Eke DAÎŞ bi nê hawayî hêrişanê xo rê dewam bikero eşkeno tay şaristananê Başûrî bivisno destî. Ganî Koalîsyono Mîyanneteweyî paştdayîşê dewleta tirke yê bi DAÎŞî hol fam bikero, biercno. Lîderê DAÎŞî Erdogan o û heta ke Erdogan hukmî ser de bibo DAÎŞ nêqedîyeno. Erdogan babîyo ruhanî yê DAÎŞî yo. Erdogan, DAÎŞ û Îhvan-î Muslîmîn wayîrê heman fikrî û mezgî yê. Ê hetê sîyasî, fikrî û têgêrayîşî ra girêdayîyê yewbînan ê.''