Hêzanê Sûrîyeya Demokratîke (QSD) dewa Baxozî ya qezaya Hecînî ya Dêra Zorî de operasyonanê vizêrî de 6 domanî û 2 cinîyê Êzidî yê ke hetê çeteyanê DAÎŞ’î ra ameybî remnayene xelisnayî. Domanî 3'ê Tebaxe 2014 de Şengal ra ameybî remnayene. Domanan vat, dimayo ke ameyê remnayê tabûra bi nameyê Eşbal el-Hîlafe (ameyoxê xîlafetî) ameyê cakerdene û çeteyan uca de perwerdeyê eskerîye û dînî dayo înan.

Şerwananê QSD’yî yê ke operasyonanê xo yê heta nikayî de herêma Hecînî de biseyan cinî û domanê Êzidî xelisnayê, perey zî 9 domanê Êzidî û 4 domanê Tirkmenê şîa yê Telaferî xelisnaybî. Domanê ke vizêrî ameyî xelisnayene , ANF’yî rê qala dejo ke DAÎŞ’î bi înan û keyeyanê înan dayê antene kerd. Domanan vat, remnayîşê înan ra dima DAÎŞ’î bi Kurdkî qisekerdiş înan rê qedexe kerdo û bado zî keyeyanê xo ra ameyê visnayene, kampan de ameyê cakerdene û seba ke bieşke komkiştişan bikerê perwerdeyê eskerîye û dînî dayo înan.

PERWERDEYÊ ESKERÎ Û DÎNÎ DAYO DOMANANÊ ÊZIDÎYAN Ê KE REMNAYÊ

Domano Êzîdî bi nameyê E.X.H. yo ke 14 serrî yo, wexto ke teba keyeyê xo Şengal ra ameyê remnayene 10 serrî bîyo. Ard ziwan ke remnayîşî ra dima ê berdê Telafer, uca de zî çeteyan o û keyeyê ci yewbînan ra cîya kerdê. E.X.H. vat, o wext ra dima ey reyna keyeyê xo ra xebere nêgirewta û o zî sey domananê Êzîdîyan ê ke ameyê remnayene berdo Mûsil, uca de perwerdeyê eskerîye û dînî dayo înan.

ZÎHNÎYETO NASKERDE: QEDEXEYÊ QISEYKERDIŞÎ YÊ BI KURDKÎ

E.X.H. ard ziwan ke, bi Kurdkî qiseykerdiş înan rê amebi qedexekerdene, coka o zaf baş Kurdkî nêzano û bi ziwanê Erebkî hîna asan eşekno xo îfade bikero, coka zî wazeno ke bi Erebkî qisey bikero. E.X.H. vat, “Telefer ra dima ma berdê Mûsil. Ma heme domanê Êzîdîyan bîyî. Wexto ke ma ameyî remnayene bi Kurdkî qiseykerdiş ma rê qedexe kerd.  No semed ra ez nika nêeşkena bi Kurdkî qisey bikera.”

WEXTO KE AME REMNAYENE 4 SERRÎ BI

Domano Êzidî bi nameyê X.Ş. (8) wexto ke ameyo remanyene 4 serrî bîyo. Kincê eskerîye, lepik û botê ke DAÎŞ’î danê xo ra, serê ey ra yê. X.Ş. ard ziwan ke rîyê teqayîşêk ra vileyê ci birîndar bîyo û nika parçeyê şarapnelî vileyê ci de esto. X.Ş. vat, DAÎŞ'î nameyê "Abdullah" nayo ci ra û keyeyê ci tayê yeno ra vîrî. Seba persê “Eke ti maye û pîyê xo bivînî ti do înan nas bikerî? Vat, “Bawer nêkena ke nas bikera.”

AMEYOXÊ XÎLAFETÎ

X.Ş. ard ziwan ke o zî kampa ke perwerdeyê eskerîye û dînî yeno dayene de ameyo girewtene û vat, DAÎŞ’î nê kampê ke zafêrî domanî tede manenê, nameyê ci "Eşbal el-Hîlafe" nabi piro. X.Ş. derheqê kampanê eskerîye yê domanan vat, “Uca de perwerdeyê eskerîye dayêne ma. Perwerdeyê Quranî zî dayêne ma. Uca de ma nêeşkayêne goreyê zerrîya xo bitêgêrayayî. La demanê peyênan de êdî kes nêpersêne ke ma çi kenê, çi nêkenê.”

EZ KEYEYÊ XO NAS NÊKENA, LA MERAQ KENA

Domanan ard ziwan ke nê kampan de hîna zaf domanî estê û wexto ke ma resimê  domananê ke çend rojî raver hetê QSD’yî ra ameyê xelisnayene nîşanê ci dayî, vat ke ma hemeyan nas kenê û nameyê înan yew bi yew vatî. X.Ş. vat, o keyeyê xo nas nêkeno, la meraq keno û ard ziwan ke wazeno şoro leyê keyeyê xo. Şerwananê YPG/YPJ'yî domanê ke xelisnayê, hetkarîya lezkanî ra dima seba ke teslîmê Mala Êzîdîyan bikerê berdî Hesekê.

BI HEZARAN CINÎ Û DOMANÊ ÊZIDÎYAN AMEYBÎ REMNAYENE

Hêzanê QSD'yî nê 4 serranê peyênan de operasyananê Tebqa, Reqa, Minbic, Hesekê û Dêra Zorî de bi seyan cinî û domanê Êzîdîyan xelisnayî û resnayî keyeyanê înan kerdî. Çend rojî verê cû 7 domanê Êzîdî Baxoz de ameyî xelisnayene. Çeteyanê DAÎŞ’î wexto ke 3'ê Adare 2014 de hêriş bi Şengalî kerd, bi hezaran cinî û domanê Kurdan ê Êzîdîyan remnayî û berdî bazaran de sey koleyan rotî.