Meclîsê Leşkerî yê Til Temirî pare kerd ke hêzanê înan cewab dayo hêrişanê cerganê dewleta tirke ya îşxalkere û netîceya ney de 19 cergî kişîyayê.

Eşkerayîya Meclîsê Leşkerî yê Til Temirî wina yo:

''Operasyonê 'Xurtkerdişê Asayîşî' roja 8. de dewam keno. Hemwextê nê operasyonî de dewleta tirke ya îşxalkere xîret kena ke nê operasyonî sey şerê ereb û kurdan bimojna. Dewleta tirke ya îşxalkere seba nê armancî her roje hêrişê herêmanê ma kena.

3yê êlule de dewleta îşxalkere hêrişanê dewanê Tewîle, Til El Tewîl û Xemse yê Til Temirî kerd la şerwananê ma cade cewab da nê hêrişan. Netîceya cewabdayîşê hêzanê ma de 10 cergê dewleta tirke ya îşxalkere kişîyayî. 

Dewleta tirke hêrişê dewa Bobî ya Zirganî zî kerd. Tîya de zî hêzanê ma cade cewab da hêrişan. Netîce de 2 cergî kişîyayî û cergêk zî birîndar bi. Dima cergan xo apey ant.''

Meclîsê Leşkerî yê Girê Sipîyî zî nê agahîyî dayî: ''Cerganê dewleta tirke ya îşxalkere 3yê êlule de hêrişê dewa Sigêroyî yê Eyn Îsayî kerd. Hêzanê ma cewab da hêrişan û 5 cergê dewleta tirke kiştî. Cerganê bînan zî xo apey ant. Cergî dima agêrayî la reyna bîyî hedefê hêzanê ma. Tîya de zî 2 cergî kişîyayî û 7 cergî birîndar bîyî.''