Hêzanê Asayîşê Zereyî yê Rojawanî bi paştdayîşê QSD, YPG û YPJyî 25ê tebaxe de Kampa Holî de vera hucreyanê DAÎŞî safhaya diyîne ya Operasyonê Asayîşî û Merdimîye dabî destpêkerdene.

Hêzanê Asayîşê Zereyî vizêr bi kombîyayîşêkê çapemenîye bîlançoya hewteyêkî eşkera kerde. Kombîyayîş de Îdarekaro Pêroyî yê Hêzanê Asayîşê Zereyî Elî El Hesen, Fermandarê YPJyî Rûkene Kobanê û Vîyane Erdal, Vervatoê QSDyî Ferhat Şamî, Serekê Meclîsê Leşkerî yê Herêma Cizîre Hisên Selmo û Îdareyê Asayîşî yê Hesekê ra Dîyala Keleş amade bîyî.

Elî El Hesen û Vîyane Erdal eşkerayîye wende.

Eşkerayîye de ame vatene ke hêrişê vera Zîndanê Sînaa yê Hesekê de zî eşkera bi ke DAÎŞ wazeno newe ra xo gandar bikero û bi taybetî herêmanê îşxalkerdeyan de pê paştdayîşê dewleta tirke payan ser de vindeno.

Eşkerayîye wina dewam kena: ''Erkê ma yo ke ma şarê xo bipawê. Kampa Holî de ma vera DAÎŞo ke wazeno şarê kampe bixapîno, safhaya diyîne ya Operasyonê Asayîşî û Merdimîye dabî destpêkerdene. Hewteyê yewinî yê operasyonî de ma nê netîceyî vistî destî:

-15ê ci endamê DAÎŞî 121 kesî tepişîyayî, 16 tunelê DAÎŞî ameyî dîyene, dest nîya xeylêk malzemeyanê cergan ser.

-119 xeymê ke DAÎŞî seba perwerde, mehkeme, îşkence û kiştişî şuxilnayêne, wedarîyayî. Dest nîya 48 telefonan, Ipad, laptop û 2 harddîskan ser.

-Dest nîya cebilxaneyê çekanê M-16î û alayanê dewleta tirke ser.

-Tehqîqatanê vera cergan de eşkera bi ke mabênê dewleta tirke ya îşxalkere û cergan de raşta raşte têkilîyêke est a.

-Hêzanê ma dest na xeylêk malzemeyanê îşkence û mekananê binê erdî yê îşkenceyî ser. Nê mojnenê ke DAÎŞ keno ke şarê kampe bitersno û bi nê hawayî waştişanê xo bi şarî bido caardene.

Safhaya diyîne ya Operasyonê Asayîşî û Merdimîye dewam kena. Heta ka ma cuya kampe asayî bikerê û çimeyan û paştgîranê DAÎŞî çin bikerê, fikranê DAÎŞî çin bikerê operasyon do dewam bikero. Hêzê ma kenê ke hewcedarîyanê şarê kampe zî bîyarê ca. Nê esasî ser o ma venga dezgehanê mîyanneteweyîyan danê ke hetkarîya merdimîye pêşkêşê roniştoxanê Kampa Holî bikerê.''