Înîsîyatîfê Abdullah Ocalanî yê Sûrîye xo amade keno ke 3 mîlyon û 699 hezar îmzayê ke arê dîyayê bişawo Yewîya Ewropa. Endama Înîsîyatîfî Nûha Omer vat ke armancê înan o verên azadîya Abdullah Ocalanî ya.
Înîsîyatîfê Abdullah Ocalanî yê Sûrîye xo amade keno ke 3 mîlyon û 699 hezar îmzayê ke çarçewa kampanya de arê dîyayê bişawo Yewîya Ewropa (YE). Endama Înîsîyatîfî Nûha Omer derheqê babete de ANFyî rê qisey kerd.
Nûha pare kerd ke çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de Rojawan û Sûrîye de xebat û çalakîyê girîngî ameyê kerdene û şar bi xurtî wayîrê hemle vejîyayo. Nûha vist vîrî ke safhaya diyîne ya hemle 15ê sibate de dîyaya destpêkerdene.
Nûha bale ante kampanyaya înan a îmzayan ser û vat: ''Kampanyaya ma 4ê nîsane de qedîyaye. Ma armanc kerdêne ke 3 mîlyon îmzayan arê bidê. Ma bi temamî 3 mîlyon û 699 hezar îmzayî arê dayî. Şarê ma perwerîya xo ya bi Rayber Apoyî bi nê hawayî eşkera kerde. Dewaya azadîya Rayber Apoyî dewaya pêro dinya ya. YE, Komîteya Vergirewtişê Îşkenceyî (CPT) û Mehkemeya Heqanê Merdiman a Ewropa mesuldarê na mesele yê. Nika seba ke ma îmzayanê xo bişawê nê dezgehan û rêxistinan karanê dîplomatîkan kenê.''
Nûha da zanayene ke Înîsîyatîfê Abdullah Ocalanî xebatanê xo pêro Rojawanê Kurdîstanî û Sûrîye de ano ca û armancê înan o sereke caardişê azadîya Rayberê Şarê Kurdî Abdullah Ocalanî yo.
