Rojawanê Kurdîstanî de komê wendişî yê pawitişnameyanê Rayberê Şarê Kurdî Abdullah Ocalanî est ê. Rojawanijê ke komanê wendişî yê pawitişnameyanê Rayberîye de cagênê, înan ANFyî rê qisey kerd.

Îsa Selîm Mihemedî ard ziwan ke înan çarçewa Hemleya 'Abdullah Ocalanî rê Azadîye' de nê komî ronayê û vat: ''Ma sey Akademîya Abdullah Ocalanî na kampanyaya wendişî daye destpêkerdene. Ma armanc kenê ke fikr û felsefeya Rayber Apoyî hol fam bikerê û bîyarê ca. Sey endamanê akademîye ganî hêverî ma pawitişnameyanê Rayber Apoyî hol fam bikerê ke şarî rê zî qalê înan raşt bikerê. Ma hem pawitişnameyan wanenê hem zî nînan ser o nîqaşan kenê. Ganî felsefeya Rayber Apoyî dibistan û zanîngehan de biba mufredat. Ma nika Sosyolojîya Azadîye wanenê. Rayber Apo pawitişnameyanê xo de ercnayîşanê girîngan keno.''

Endama kome û vervatoxa kome Taze Başa vat: ''Rayber Apo pawitişnameyanê xo de qalê cinîyan û azadîya cinîyan keno. Seba ke ma fikr û felsefeya Rayber Apoyî hîna hol fam bikerê û komelî rê qalê ci bikerê nê pawitişnameyan wanenê. Rayberîye pawitişnameyanê xo de têkilîya exlaq û komelî ser de zaf vindena. Ewro fikrê Rayberîye pêro dinya rê vila benê. Rojawan de zî nê fikrî kokê şorişî de yê. Şorişê Rojawanî bi fikranê Rayberîye ronîya û ewro pêro dinya rê beno îlham. Ma sey cinîyan wazenê ke bibê serkêşê felsefeya Rayber Apoyî.''

Endama kome ya bîne Medya Osî vat: ''Ez seba ke pawitişnameyan fam bikera û her kesî rê qalê ci bikera tewra koma wendişî bîya. Koma wendişî reyde kesayetê mi zî aver şi. Nê xebatî zaf bibereket ê. Xora ma verê cû zî pawitişnameyî wendbî. La kome reyde wendiş ma rê bingeyêkê xurtî pêşkêş keno. Wexto ke ma çareserîya meseleyan de zehmetîye ancenê, muracatê nê pawitişnameyan kenê. Cuya ma ya şexsîye ra heta cuya karî û komelî nê pawitişnameyî ma rê benê rêber.''