Pirdê Qereqozaxî û Awbendê Tişrînî de xoverdayîşê şerwanan vera hêrişanê dewleta tirke ya îşxalkere û çeteyanê ci yê SMOyî bi xurtî dewam keno. Xoverdayîş de şerwanê QSD û YPJyî cagênê.

Fermandaranê YPJyî ra Şîraze Nîdala ke  Erebîstana Siûde ra ya, nê şerwanan ra yew a. Fermandare Şîraze wexto ke zanîngeh de Fakulteya Tipî de wendêne verê xo da refanê YPJyî. 

Fermandare Şîraze cepheyê şerî de ma rê qisey kerd. Şîraze Nîdal da zanayene ke 2018 de a seba perwerdeyê tipî şîya Helebê Sûrîye û wina dewam kerd: ''Mi kitaban ra, cigêrayîşî ra zaf hes kerdêne. Mi hendê wend bingeyê ferasetê Şorişê Rojawanî fam kerd. O çax nê fikran zaf tesîrê mi kerd. Mi YPJ şinasna û ez hîna zaf fikirîyaya. 2020 de bi nê ferasetê azadîye ez tewra YPJyî bîya. Dewleta tirke ya îşxalkere û çeteyanê ci o çax zî vera hêrişê Rojawanî kerdêne. Ma tim amade bîyî. Ma hêzê xo her hetî ra rêxistin kerdî. Serkewtişê xoverdayîşê ewroyînî sayê ê amadekarîyan ra yo.

Ma dewayêka heqdare kenê. Ma şerwanê winayênî yê ke armanc û hedefê ma est ê. Dewleta tirke û çeteyî ci tena rijnenê û talan kenê. Coka ê bin kewenê. Mi rîyê dewleta tirke yo qirkere nê hêrişanê peyênan de hîna hol şinasna. Ganî pêro dinya nê hêrişan û polîtîkayanê talanî yê dewleta tirke û çeteyanê ci bivîna. Ma do bi ruhê fedayî heta peynî seba azadîye têkoşîn bikerê.''