Fermandara QSD û YPJyî Jîyane Tolhildan, Fermandare Roje Xabûr û Endama YATî Barîne Botan 22ê temmuza 2022yî de netîceya hêrişê dewleta tirke ya îşxalkere de şehîd bibîy. Cenazayê înan bi merasîmêkê pîlî ameyî oxirkerdene.

Merasîm Goristanê Şehîd Dijwarî de dewa Dawudîye ya Hesekê de ame kerdene. Bi des hezaran hemwelatîyê herêma Cizîre tewrê merasîmî bîyî. Merasîm de fotografê şehîdan, alayê YPG û YPJyî ameyî berzkerdene. Merasîm de sloganê sey 'Şehîdî nêmirenî' ameyî eştene.

Tîya de verî Endama Meclîsê Keyeyanê Şehîdan Edle Misto qisey kerd û vat: ''Dişmenê ma faşîst o û xîret keno ke bi rayîrê hêrişan îradeyê şaranê azadan çin bikero. Xoverdayîş û fedakarîya şehîdan do dişmenî bin bivisnê.''

Nameyê YPJyî ser o Fermandare Sozdare Dêrik vat: Ma şexsê hîrê şehîdan de pêro şehîdanê azadîye yad kenê. Ma çend şehîdan bidê zî verê dişmenî de milê xo çewt nêkerdê û îradeyê xo nêşiknê. Ma do hêrişanê îşxalî yê dewleta tirke vindarnê û pêro herêmanê îşxalkerdeyan azad bikerê.''

Hemsereka PYDyî Asya Abdullah vat: ''Şarê Rojawanî do vera hêrişan qels nêbê. Ma do seba YPJ, yewinanê pawitişî û keyeyanê welatperweran xo ver bidê.'' Asya îfade kerd ke waro mîyanneteweyî mesuldarê sûcanê dewleta tirke yo.

Qiseykerdişan ra dima Meclîsê Keyeyanê Şehîdan nasnameyê şerwanêka YPJyî Sema Xelî (Sema Cûdî) eşkera kerd ke mîyanê Şorişê Rojawanî de şehîd bîye.

Endama Meclîsê Keyeyanê Şehîdan Rojda Ehmed wesîqayê şehadetê şehîdan wendî û teslîmê keyeyê înan kerd.

Dîya zanayene ke Roje Xabur Goristanê Şehîd Rûstem Cûdîyî yê Dirbêsîyê de, Jîyane Tolhildan û Barîne Botan zî Kantonê Şehba de Goristanê Şehîdan de do bêrê definkerdene.