Endama Konseya Hemserekîye ya PYDyî Foza Yûsif bi wesîleya serrgêra Şorişê Rojawanî ANFyî rê qisey kerd û gefê îşxalî yê dewleta tirke ercnayî.

Foza Yûsif ard ziwan ke 11 serrê şorişî seba şaranê Rojawanî hetê hetî ra bîyê mîladêk û vat: ''Rojawan de wisarê şaran bi Şorişê 19ê Temmuze qewimîya. Hêzê antîdemokratîk û serdestî seba ke şorişî ra aciz ê dişmenê ci yê. Projeyê Rojawanî projeyo tewr xurt ê demokratîkbîyayîşî yo. Hêzê faşîstî, nîjadperest û dişmenî coka nê projeyî xo rê sey gefî vînenê. Destpêkî ra nata vera Şorişê Rojawanî hêrişî est ê û şarî vera nê hêrişan xo ver danê. Ma heta nika zaf zehmetî dîye la esasanê Îdareyê Xoserî û Neteweya Demokratîke ser de dewam kenê. Seba mendekerdişê sîstemî û destkewteyan têkoşînêko pîl yeno kerdene.''

Foza Yûsif da zanayene ke vera Şorişê Rojawanî timm gefî est bîyî û înan seba pawitişê şorişî bedelê giranî dayî. Foza vat: ''Şorişê Rojawanî yê 19ê Temmuze seba şarê herême sîstemêko newe, cuyêka newîye awan kerdî. No sîstem seba şaran bi hemleyêke û hêvîyêke. Ewro serkêşîya dewleta tirke de gefê herişî yenê wendene. Xora dewleta tirke her roje hêrişê herême kena. Şaranê herême her wextî ra zêdeyêr fam kerdo ke Îdareyê Xoserî ra ber rayîrêkê çareserîye çin o. Rayîrê bînî kaos û nearamî yê.

Heta nika teberê Sûrîye de, bê Sûrîye pêkerdişî, peymanî û kombîyayîşî ameyî kerdene û şaranê Sûrîye nê red kerdî. Çareserîya krîzanê Sûrîye teber de nîya. Mesele mîyanê Sûrîye de ya, çareserîye zî ganî Sûrîye de bêra afernayene. Ne Cenevre ne zî Astana seba Rojawanî nêbîyî çareserîye. Nînan de menfaatê ê dewletan ameyî esaskerdene. Eke ewro Sûrîye de krîz dewam keno sebebê ci nê kombîyayîş ê.''

Foza Yûsif bale ante kombîyayîşê 19ê Temmuze ser ke Tehran de mabênê Putin-Erdogan û Reîsîyî de ameyo kerdene. Foza vat: ''Ma nê kombîyayîşî qebul nêkenê. Nê kombîyayîşî pêro vera Sûrîye yê. Vera pêro biranê ke yewî û asayîşê Sûrîye do xera bikerê, ma do xo ver bidê û têkoşîn bikerê. Eke no kombîyayîş do dewamê Astana bibo kaos do giranêr bikero, xizmetê şaranê Sûrîye nêkero. Ganî şarê Sûrîye derheqê çarenûsê xo de qisey bikerê. Îtîfaqê winasênî bîyî sebebê şerêkê pîkî. Vera nê îtîfaqan ganî şarê Sûrîye îtîfaqê xo bikerê. Çarenûsê pêro şaranê Sûrîye yew o.''