Endama Heyetê Hemserekîye yê  Partîya Yewîya Demokratîke (PYD) Foza Yûsif derheqê Pêkerdişê Komelkî yê Rojawanî cewab da persena ANFyî.

2014î ra nata qala Pêkerdişê Komelkî yena kerdene, qey hende kerd derg?

Pêkerdişo Komelkî 2014 de Herêma Cizîre de amebi qebulkerdene. O wext Îdareyo Xoser newe amebi ronayene û tay warî hema DAÎŞî ra nêameybî azadkerdene. Seba ke heme kantonê Rojawanî tede ca bîgêrê newera ame destgirewtene. Nê esasî sero 2021 de Meclîsê Rojawanî 158 kesan ra komîsyonêk na ro ke 50ê înan cinî bê. Nê komîsyonî heme şarî, bawerî, dezgeh û hetî temsîl kerdêne. Dima ra komîsyonêko dahîna xurt ame ronayene û taslak kerd hazir. 7 kantonan de şarî nê ser nîqaş kerd. Ma zî xeylêk kombîyayîşî kerdî. Rîyê hêrişanê vera Rojawanî meseleyê asayîşî zî qewimîyayî. Coka ge ge mabên dîya xebete. Komîteya hîra hewteyêk cuwa ver reyna kom bî. Çar rojî nîqaşî ameyî kerdêne. Bado ke bi temam ma teqdîmê Meclîsê Rojawanî kerd.

Pêkerdişê Komelkî rê qey hewce bibê, no sîstemî rê senî bedilnayîşan ano?

Ma herra Sûrîye de se ra 30 temsîl kenê. Na herre de xeylêk şarî ciwîyenî. Temamî de 5 mîlyon nufusê ma est o. Semedê cuya komelkî û sîyasîyî pêkerdişêkê komelkî yê hemparî hewce kerdêne. Heta nika xeylêk kantonan de pêkerdişê verênî ser sîstemê xo rayraberdêne, la no zaf teng bi. Pêkerdişo Komelkî sere de semedê xebatanê Îdareyê Xoserî muhîm o. Rolê meclîsan vejîya vernî, hinî do dahîna aktîf bê. Şar do meclîsan de û prosesanê qerarî de dahîna zaf ca bîgêro. Çarçewaya îlkeyanê demokratîk û azadîwaştoxan de do bedilnayîşê xurtî berê kerdene.

Pêkerdişê Komelkî xo serê zîhnîyetî senînî ser o înşa keno?

Çarçewaya netewa demokratîke de,  xo cuyeyêka demokrasî, azadîya cinîyan û ekolojîkî ser ronişeno. Ma hem paradîgmaya Rayber Apoyî ra hem zî tecrubeyanê pêkerdişê demokratîkî yê dinya ra feyde kerd. Xora ma mîrasê kulturkî û komelkî yê herême ra zî feyde kerd. Nê pêro ameyî wendene, cigêrayene. Seba ke komelê ma dahîna edîl û demokratîk biciwîyo ma nê pêro xo rê sey çime girewtî.

Madeyê semedê garantîya heqanê cinîyan est ê?

Qarantîkerdişê heqanê cinîyan, prensîbê pêroyî, huqûq û azadîyî sîstemê komelkî de est ê. Reyna Meclîsê Cinîyan ê Rojawanî sey beşa taybete zereyê pêkerdişî de gerîya binê asayîşê fermîyî. Cinîye mîyanê sîstemê edaletî de xo rêxistin kena. Cinîyî û heqê înan pêkerdiş de heme madeyan de zelal ameyî pênaskerdene, bi madeyanê taybetan ameyî garantîkerdene. Seba ke wextê verê ma de Pêkerdişê Komelkî yê Cinîyan zî bêro kerdene, madeyê neweyî ameyî cakerdene.

Qey şima Pêkerdişo Komelkî sey referandumî  teqdîmê şarî nêkerd?

Eslê xo de ma waşt sey referandûmî bikerê la rewşa sîyasîyî musade nêkerd. Zaf tehdît û hêrişî est ê. Ma şarî reyde xeylêk kombîyayîşî kerdî û fikrê înan girewtî. Heme madeyî ameyî nîqaşkerdene. Yew bi yew ameyî wendene û derheqê ci de fikrî ameyî girewtene.

Bi Pêkerdişê Komelkî hedefê şima yo bingehî çîyo?

Hedefê ma yo bingehî oyo ke ma komelê azadîwaştox, ekolojîk û demokratîkî ronê.  Sebebê rewşa krîzê a ke Sûrîye ewro ciwîyena, oyo ke qanûnê bingeyî yo demokratîk o ke heme şaran û heqan paweno, çîn o. Ma wazenê semedê çareserîya heme problemanê Sûrîye nimûneyêk vejê werte. Pêkerdişê Komelkî yê Rojawanî semedê Sûrîye û heme herême modelo alternatîf o.  No semedê heme şaran û cinîyan do bibo mîladêko newe.