Daîreyê Têkilîyanê Teberî yê Îdareyê Xoserî yê Vakur û Rojhelatê Sûrîye vera beyanatanê Wezîrê Têkilîyanê Teberî yê Rûsya Sergey Lavrovî bi beynatêkê nuştekî cewab da.

Lavrovî roja seşêmeyî pare kerdibi ke Îdareyo Xoser seba dîyalogan bi hawayêkê cidîyî tênêgêreno. Îdareyê Xoserî vera beyanatanê Lavrovî beyanatêko nuştekî kerd. Beyanatê Îdareyê Xoserî wina yo:

"Dewleta Tirke 9ê teşrîna verêne ra nat binê şertê adirbirnayîşî de zî hêrişanê xo dewam kena û şertê adirbirnayîşo ke mabênê Rûsya û DYA de ame îmzakerdene binpay kena. Bi sebebê adirbirnayîşî û herêma biasayîşe Dewleta Tirke sere de Til Temir, Eyn Îsa û M-4î hêrişê Vakur û Rojhelatê Sûrîye kena. Netîceyê hêrişan de 350 hezar kesan koç kerd, bi seyan sivîlî şehîd û birîndar bîyî û demografîyê herêma ame vurnayene. Çarçewa nê dîmenan de ganî Rûsya rolê xo bi hawayêkê aktîfî bîyara ca. Çunke rastîya pratîkê peymane nêna caardene. Nê esasî ser o ma reyna îfade kenê ke ma sey Daîreyê Têkilîyanê Teberî yê Îdareyê Xoserî seba ke Şamî reyde dîyalogî aver şorê tedbîrê xo girewtî û ma amade yê ke seba naye bixebitê.Dîyalogê ke ma Şamî reyde kerdî musbet û girîng ê. La seba ke Şamî hema tam bire nêdaye ke dîyalogê sîyasî wazeno yan ney ma reyna venga Rûsya danê ke sey garantorê peymane rolê xo bi hawayêkê aktîfî bîyara ca. Ma terefgîrê haştîye yê û ma wazenê ke Tirkîya hêrişanê xo biqedîna. Ma seke verê cû kerd reyna anê ziwan ke ma seba pêro dîyalogan, çareserîyan û pêkerdişan amade yê. Û ma wazenê bivisnê vîrî ke derheqê estbîyayîşê DYA yê herême û vurnayîşê ci yê terefan de peymanêka ma çin a.Îdareyê Rûsya baş zanena ke cayê ke Tirkîya hêrişê ci kena çarçewa peymana Tirkîya-Rûsya de nîyê û kerdişê ma pêro zî çarçewa pawitişê meşrû de yê. Naye ra ganî Rûsya komîteyêke saz bika ke kerdişê Tirkîya ser o cigêrayîş bikera."