Şarê Rojawanî hema zî beno hedefê hêrişanê dewleta tirke û cerganê ci. Herême de têna remnayîş, qetilkerdiş, dizdîye û talan ney hêrişê cînsîyî yê vera cinîyan zî benê zêdêr. Goreyê doneyanê dezgehanê heqanê merdiman Serêkanîyê de nê wextanê peyênan de 30 hebî hêrişê cînsî yê vera cinîyan ameyî kerdene.

Girê Sipî de ciwanê ke hetê dewleta tirke ra ameyî remnayene înan ra 3 mengan ra nata xeberêke nêna girewtene.  Cinîyanê Girê Sipî derheqê kerdişanê dewleta tirke de qisey kerd.

Fadîya Şerîfa ke Tilseman de kampa koçberanê Girê Sipî de îdarekarîye kena hêrişê cînsî yê dewleta tirke û cerganê ci yê vera cinîyan şermezar kerdî. Fadîya vat: ''Dewleta tirke îradeyê cinîyan ê azadan ra tersena coka hêrişê înan kena.Cinîyanê Rojawanî têkoşînê vera DAÎŞî de zî cayêko girîng girewt.''

Îdarekara Kongreta Starî Meha Hemed zî vist vîrî ke îşxalê dewleta tirke yê vera Rojawanî de bi hezaran kesan koçber kerd. Meha îfade kerd ke hêrişê vera cinîyan zêdîyenê û venga rayaumûmîya mîyanneteweyî da ke cinîyanê kurdan bipawa û dewleta tirke rê teda bikera.