Îşxalê dewleta tirke yê vera Rojawanî de tewr tay 300 hezar kesî neçare mendî ke koç bikerê. Meclîsê Kantonê Girê Sipî seba koçberan 22ê teşrîna peyêne de Eyn Îsa de kampêke naye ro. Dezgehê mîyanneteweyî hetkarî nêdanê kampe û pêro hewcedarîyî hetê Heyva Sore ra yenê peydakerdene. 

Nufusê kampe resa hezar û 164 la hema zî koçberî yenê kampe. Kampe de hewcedarîyê batanîye, xeyme û ê çîyanê bînan estê.

Îdarekarê kampe Mihemed El Şêxî pare kerd ke kampe de hema zî tay koçberî bêbatanîye yê û înan venga rêxistinanê hetkarî yê mîyanneteweyan da ke paştî bidê koçberan la cewabêk nêgirewt. El Şêxî ard ziwan ke têna Heyva Sor a Kurdîstanî hetkarîya koçberan kena û Îdareyo Xoser zî xeyme, batanîye û ê hewcedarîyanê bînan peyda keno.

El Şêxî da zanayene ke seba ke dezgehê mîyanneteweyî bi hawayêkê bêpersîyarî têgêrenê krîzê merdimîye beno pîlêr.

Koçbera bi nameyê Fîda El Nekaş îfade kerd ke aye dewa Şergirekî ra koçê kampe kerd û koçberanê bînan reyde paştî danê yewbînan.  Fîda vat ke ê xoverdayîşê co dewam kenê.