Halabjaye: Sîyasetê PDK’yî dewleta Tirkî dir hemparî ya

Avûkate, rojnamegere û nûştoxe Sruşah Halabjaye ke Başûrê Kurdistanî ra tewrê forûmê bi babeta DAÎŞ’î yê Amûdê bîbî, hemverê hemkarîya PDK’yî ya dewleta Tirkî de reaksîyon da.

Forûmo ke bi babeta DAÎŞ’î Rojawan de amebi viraştene rê welatanê cîyayan ra xeylî nûştox, sîyasetmedar û roşinvîrî tewrê ci bîyî. Kesê ke tewrê forûmî bîyê ra yewe zî avûkate, rojnamegere û nûştoxe Sruşah Halabjaye bîye.

Sruşahe ard ziwan ke serra 2003 ra nata a rojnamegerîye kena, Rojawanî de bîyayîşî ra xeylî kêfweş a û vat, “Rojawan de virazîyayîşê forûmê bi babeta DAÎŞ’î wayîrê muhîmîyêka pîle yo. Tîya bi destê DAÎŞ’î birînê ke cinîyan de ameyê viraştene estê. Hetêna ra Rojawan de bi destê cinîyan qedînayîşê DAÎŞ’î na herême hîna keno muhîm.”

Sruşahe vat, “Cinîyê ma bi na wesîle, hem hêzê xo yê cewherîyî ferq kerdî, hem zî ramot ke ê bi nê hêzî eşkenê biresê netîce. Înan hemeyê dinya rê da famkerdene ke tena hemverê DAÎŞ’î de nê, çi hêzo ke terorî ferz bikero, biwazo wareyê ma û erdanê ma îşxal bikero sey cinîyî ma do tim cewab bidê. Kobanê de û Şengal de xeylî şehîdê ma nê şerî de bedenê xo kerdî feda û erdê ma azad kerdî. Ma zî heta tena yew cinî bimano ganî mucadeleyî xo rê esas bigêrê û heqê keda înan bidê.”

Sruşahe ard ziwan ke 13 welatanê cîyayan ra forûmî rê tewrbîyayîş estbîyo û vat, “Ganî ma nêkerê xovîr ra ke rayîrê azadîya cinîyan ê dinya azadîya cinîyan ê Kurdan ra ravêreno. Ez xoverdayîşê cinîyanê ke ewro Cezayîr de û heme cayanê bînan ê dinya de hemverê hêzanê terorîstan de şer kenê silam kena. Ma sey şaro Kurd cimatêko cahil nêyê, ma nêvanê înan kişt o wext ma zî bikişê. Ma wazenê ken ê kesî mehkemayêk de bêrê muhakemekerdene û her het tede ca bigêro. Ma wazenê ke hendî nê problemî zemînêkê qanûnîyî de hal bikerê.”