Kampa Holê ya ke 67 hezar kesê keyeyanê endamanê DAÎŞî yê 50 welatan tede yê sey ''kampa zaf bitehlûke ya dinya'' yena şinasnayene.

Dima ke Hêzanê Sûrîyeya Demokratîke (QSD) 21ê adara 2019î de bajarekê Baxozî yê Dêra Zorê de estbîyayîşê ser erdî yê DAÎŞî ard rayaumûmîya dinya xîret kena ke DAÎŞ Kampa Holê de vîr bikera.

Labelê serebûtê ke kampe de qewimîyenê bi taybetî dima ke dewleta tirke hêrişê Rojawanî kerd DAÎŞ newe ra ganî bi.  No zî tehlukeyê kampa Holê keno zêdêr.

Bi krîzê sîyasî yê Iraqî û îşxalê dewleta tirke yê vera Rojawanî DAÎŞ sere de Iraq û Sûrîye zaf herêman de newe ra têgêreno.

Eşkerayîyê vervatoxanê koalîsyonê mîyanneteweyî yê vera DAÎŞî  rewşe rast kenê la reyna zî newera ganîbîyayîşê DAÎŞî nêno astengkerdene. DAÎŞ xo newe ra rêxistin keno. Halînanê verênan ê DAÎŞî ra yew zî kampa Holê yo ke başûrê rojhelatî yê Hesekê de yo.

Iraq û Sûrîye zî tede 67 hezar kesî welatanê sey Tirkîya, Azerbeycan, Çeçenîstan, Hollanda, Norweç, Fînlandîya, DYA, Endonezya ra ûsn kampe de estê. Rêxistina cergan xîret kena ke xo newe ra ganî bikera.

Çend mengî verê cû kampe de 70 hezar kesî mendêne. Nika goreyê doneya kampe de 67 hezar kesî estî.

Rêxistina El Hisbe

Kampe bi temamî 13 beşan ra yena meydan. DAÎŞ bi rêxistina El Hisbe  kampe de cerganê xo kom keno. Na rêxistin a ke bi giranî 'muhacîr' û 'cîhadîstan' ra yena meydan kampe de bi hawayêkê eşkera perwerdeyan kena, mehkemeyan awan kena.

Na rêxistine derheqê kesanê ke DAÎŞî qebul nêkenê de bira înfazî dana. Kampe de 8 mengan de 26 cinîyî bi bahaneya ''vera rêxistine sere wedarit û fermanî nêgoştaritî'' hetê rêxistine ra ameyî kiştene. Îdareyê kampe vat ke hûmara kesanê ke ameyî înfazkerdene beno ke zêde ya. 

Rêxistina El Hisbe destpêk nîya. Kampe de şaristanê Eyn Îsayî de zî yeno zanayene ke DAÎŞ xo rêxistin kerd. Wexto ke 9ê teşrîna verêne de dewleta tirke hêrişê Serêkanîyê û Girê Sipî kerd zaf DAÎŞijî kampa Eyn Îsayî ra remayî. Yeno vatene ke na rewşe seba DAÎŞî û El Hisbe motîvasyonêko pîl a.

Berpirsîyaranê Kampa Holê ra Hemrîn Hesenî derheqê înfazanê rêxistina El Hisbe de cewabî dayî persanê ma û ard ziwan ke 26 cinîyî ameyî kiştene. Hesenî îfade kerd ke El Hisbe bi fermananê DAÎŞî têgêreno û wezîfeyê DAÎŞî ano ca. Hesenî bale ante ser ke na rewşe seba herême û dinya do biba meselêka girane.

Hemrîn Hesenî pare kerd ke her cayê dinya de Neteweyê Yewbîyayeyî bi berpirsîyarîya kampan wurzenê ra labelê Kampa Holî de nê wezîfeyê xo nêanê ca û berpirsîyarîya Kampa Holê milê Îdareyê Xoserî de ya.